Mbërrin fundjava e nxehtë, termometri do të shënojë 36-37 gradë Celcius

12/06/2015 00:00

Këtë fundjavë mund t’u drejtoheni plazheve pa hezituar. Shërbimi Meteorologjik parashikon mot të nxehtë, ku temperaturat do të fillojnë të rriten që të shtunën me 1 -2 gradë Celcius, për të vijuar sërish me rritje ditën e diel.

“Duke filluar nga dita e shtunë, vendi ynë do të fillojë të ndikohet nga qarkullimi i masave ajrore relativisht të qëndrueshme që do të sjellin në vendin tonë mot kryesisht të kthjellët, përgjatë vijës bregdetare. Të shtunën do të ruhen zhvillimet e mesditës që do të jenë të përqëndruara në pjesën juglindore të vendit, ku në mesditë do të marrin zhvillim duke u shoqëruar me rreshje lokale shiu. Dita e diel do të kemi mot kryesisht të kthjellët përgjatë vijës bregdetare dhe zhvillime vranësirash në juglindje dhe në verilindje të vendit. Duke filluar që sot (e premte) temperaturat janë deri në 34-35 gradë, nesër do të kemi një rritje prej një gradë”, thotë Blerta Sherollari, Shërbimi Meteorologjik Ushatrak.

Ndonëse termometri pritet të shënojë 36 deri në 37 gradë Celcius, por kjo temperaturë parashikohet në hije, pasi i nxehti mund të ndihet më shumë rrugëve edhe për shkak të nivelit të lartë të lageshtirës në ajër.

Ndërkohë në fillim të javës tjetër, të martë apo të mërkurë pritet të ketë paqëndrueshmëri të motit, e cila mund të shoqërohet me reshje lokale.

Top Channel