Rama: 21 Qershori do ta shkundë PD-në. Na duhet një opozitë që nuk flet përçart

“Këto zgjedhje do të jenë një shkundje edhe për PD-në, sepse edhe PD-ja na duhet në drejtimin e duhur. Na duhet një opozitë që nuk flet përçart, por një opozitë që flet me njerëzit dhe për njerëzit dhe që mban nën tension qeverinë me alternativa, jo me shpifje”, tha Rama.

Kryeministri shtoi se ndarja e re administrative i jep fund mungesës së potencialeve të pushtetit vendor për t’u shërbyer qytetarëve, por edhe abuzimit prej kryetarëve.

“Qytetarët e Devollit kanë votuar gjithë këto vite për komunat, por kanë marrë shumë pak në rastin më të mirë dhe në rastin më të keq kanë marrë mbrapsht kryetarë komunash grabitës pyjesh, kullotash, kryetarë komunash që janë marrë me tjetërsime titujsh pronësie, me transformimin e ndihmës ekonomike në një lëmoshë për skllevër elektoralë. Kjo do të marrë fund më 21 Qershor!”, tha Rama.

Ndryshimet mes Korçës së drejtuar nga socialistët dhe Devollit të drejtuar nga demokratët, për Ramën janë dy shembujt tipikë që tregojnë dy modele të ndryshme. “Dy shembuj që ndajnë modelin tonë për zhvillimin e komunitetit me modelin e PD-së për të sunduar komunitetin”, tha ai.

Ndërsa nga Prrenjasi, ku kandidon Miranda Rira, kryeministri ftoi gratë dhe vajzat të marrin pjesë në votime, duke mos e nënvleftësuar 21 Qershorin.

“Të gjitha gratë dhe vajzat me të drejtë vote do të kenë mundësi që të marrin pjesë në vulosjen e një vendimi historik të Aleancës për Shqipërinë Europiane. E vendimit që me shumë kurajo emancipuese, Partia Socialiste dhe Lëvizja Socialiste për Integrim morën për të çuar 50% gra dhe vajza në kuvendet e reja vendore. Më 21 Qershor, gratë dhe vajzat të shkojnë lumë drejt qendrave të votimit sepse atë ditë nuk duhet të mungojë asnjë grua në votim”, tha Rama.

Top Channel