Meta në Podgoricë, merr pjesë në punimet e Partisë Demokratike Socialiste

Gjatë fjalës së tij para të pranishmëve në këtë aktivitet, Meta çmoi marrëdhëniet shumë të mira që ka ndërtuar Shqipëria së bashku me Malin e Zi, jo vetëm për shkak të afërsisë gjeografike dhe kulturore, por edhe falë popullsisë shqiptare, e cila është një urë e fortë lidhëse mes dy vendeve.

“Pata kënaqësinë të dëgjoj disa përfaqësues të partive shqiptare këtu, ashtu siç kam kënaqësinë të përfaqësoj të gjithë shqiptarët e Shqipërisë sot (e shtunë) këtu dhe, në radhë të parë, koalicionin qeverisës të Shqipërisë ‘Aleancën për Shqipërinë Europiane’. Mali i Zi është një vend i mrekullueshëm dhe miqësia e natyrshme, që ekziston mes nesh, është një shembull për të gjithë rajonin dhe për këtë ne jemi krenarë”, u shpreh Meta.

“Ne e çmojmë shumë zhvillimin e jashtëzakonshëm demokratik të Malit të Zi gjatë këtyre dy dekadave dhe, është e qartë si kristali se, shtylla kurrizore e këtij progresi substancial të Malit të Zi në këto dy dekada ka qenë pikërisht Partia Demokratike e Socialistëve (DPS) me kreun e saj Milo Gjukanoviç. DPS ka bërë të mundur jo vetëm Malin e Zi, si një shtet të pavarur, por edhe Malin e Zi, si një faktor shumë të rëndësishëm të qëndrueshmërisë dhe të bashkëpunimit në të gjithë rajoni tonë”, deklaroi më tej kryetari i Kuvendit.

Ndërkaq, Ilir Meta theksoi se Shqipëria dhe Mali i Zi kanë një të ardhme të vetme, atë të anëtarësimit në Bashkimin Evropian dhe uroi që, përmes këtij kongresi, të fitohen energji të reja për të përballuar me sukses sfidat e Malit të Zi, por edhe sfidat e përbashkëta për të gjithë rajonin tonë.

“Dua t’iu siguroj se, te Shqipëria do të gjeni gjithmonë një fqinj dhe një mik të vërtetë e të besueshëm, ashtu siç e shohim dhe e ndiejmë edhe ne Malin e Zi. Dy vendet tona kanë një të ardhme të vetme, atë të anëtarësimit në Bashkimin Evropian. Ju keni avancuar më përpara në rrugën e negociatave me BE-në. Ne, nga ana tjetër, jemi anëtarë të NATO-s prej disa vitesh. Shumë shpejt, ne do jemi me ju në procesin e negociatave me Bashkimin Evropian dhe ju do jeni me ne të anëtarësuar në NATO. Kjo është rruga, që na bashkon, kjo është e ardhmja, që na pret, ndaj iu uroj përmes këtij kongresi të fitoni energji të reja për të përballuar me sukses sfidat e Malit të Zi, por edhe sfidat e përbashkëta për të gjithë rajonin tonë, për paqe dhe prosperitet për të gjithë popujt tanë”, – mbylli fjalën e tij kreu i Kuvendit, Ilir Meta.

Top Channel