Pakistan, vala e të nxehtit vret 450 persona; qeveria merr masa të jashtëzakonshme

Autoriteti Kombëtar për Menaxhimin e Katastrofave deklaroi se ka marrë urdhër nga Nawaz Sharif që të ndërmarrë masa efikase dhe imediate ndaj situatës.

Në kuadër të masave është angazhuar edhe ushtria, e cila ka ngritur disa qendra të vogla mjekësore për t’u ardhur në ndihmë njerëzve.

Autoritetet shëndetësore deklarojnë se shumë vdekje janë regjistruar në qytetin më të madh të vendit, Karaçi, që në ditët e fundit ka përjetuar temperatura që kanë arritur deri në 45 gradë Celsius.

Ndërkohë, disa qindra pacientë që po vuajnë efektet e vapës së madhe po kurohen në spitalet shtetërore, kanë njoftuar zyrtarët lokalë.

Situata ka bërë që në vend të rritet kërkesa për elektricitet, me qëllim përdorimin e ajrit të kondicionuar.

Moti i nxehtë nuk është i papritur gjatë muajve të verës në Pakistan, por zgjatja e mungesës së energjisë e ka përkeqësuar situatën, raporton i dërguari i BBC, Shahzeb Jillani.

Në disa pjesë të qytetit janë verifikuar protesta sporadike, me banorët që kanë fajësuar qeverinë dhe entin kryesor të energjisë, K-Electric, për dështim në shmangien e vdekjeve.

Kryeministri kishte njoftuar se nuk do të kishte ndërprerje të furnizimit me energji, por ato janë shtuar që nga fillimi i muajit të Ramazanit. Shumica e viktimave janë të moshuar nga familje me të ardhura të ulëta.

Top Channel