Prokuroria dërgon për gjykim shtetasin që tentoi të vriste 4 policë në Sarandë

30/06/2015 00:00

Prokuroria e Krimeve të Rënda ka dërguar për gjykim kërkesën ndaj shtetasit Taulant Xhini, i akuzuar për veprën penale të “vrasjes në rrethana cilësuese të punonjësit të policisë, mbetur në tentativë”, në bashkëpunim.

Ngjarja për të cilën akuzohet 28-vjeçari ka ndodhur më 27 prill të vitit të kaluar në fshatin Shëndëlli, në zonën pranë Butrintit, në Sarandë, kur disa oficerë të Policisë së Sarandës kishin marrë detyrë të arrestonin shtetasin Xhini. Në atë kohë Xhini ishte në kërkim, i akuzuar për veprën penale të “vrasjes me dashje”, të mbetur në tentativë dhe “armëmbajtje pa leje”.

Pasi kryen vëzhgimin për disa orë dhe nuk gjetën gjurmë të Xhinit, në momentin që grupet operacionale po largoheshin nga rrethimi, kundër 4 prej oficerëve të policisë janë drejtuar disa breshëri armësh. Fatmirësisht, plumbat e drejtuar oficerëve të policisë dëmtuan vetëm mjetet ku oficerët sapo kishin hipur. Menjëherë pas sulmit me armë, forcat policore kanë marrë pozicion sulmi, por ndërkohë agresorët ishin larguar.

Hetimi për të pandehurin Xhini është kryer në mungesë, pasi deri në këtë moment nuk është bërë i mundur arrestimi i tij.

Top Channel