Bayer Leverkusen kërkon Lorik Canën

Në ditët e shkuara, sikurse raporton Supersport, është folur për interesimin e Schalke 04, por siç bën të ditur në versionin e saj të printuar “Il Messagero”, lajm që e përcjell më pas edhe “TuttoMercatoweb” veç “bluve mbretërorë”, në ndjekje të Lorik Canës është dhe një klub tjetër i Bundesligës, pikërisht Bayer Leverkusen, klub që do të luajë këtë vit në Champions League, duke e nisur nga ndeshjet e play-off, pasi e përfundoi kampionatin në vendin e 4-t të klasifikimit.

Në të shkuarën, Cana ka pranuar publikisht pëlqimin e tij për Bundesligën për shkak të futbollit që aplikohet aty, mënyrës se si e përjetojnë tifozët futbollin, por padyshim dhe ambicies për të vijuar një tur prestigji në kampionatet më të fortë të Europës pas eksperiencave në Ligue 1 në Francë, Premier League angleze, Superligën turke dhe së fundmi dhe Serinë A.

Gjithsesi, për sa i përket të ardhmes së Canës, tashmë 31-vjeçar nuk përjashtohet edhe një pistë më ekzotike, pasi mediat italiane konfirmojnë interesimin e fortë për të edhe nga disa klube të MLS, Ligës Amerikane të Futbollit, aty ku po investohet gjithmonë e më shumë për të rritur popullaritetin e kësaj loje dhe ku aktivizohen tashmë disa nga yjet më të famshëm të futbollit europian.

Megjithatë, në transferimin e Canës një rol të rëndësishëm ka dhe Lazio, pasi ai ka një kontratë që skadon vitin e ardhshëm dhe Presidenti Lotito kërkon të përfitojë një shumë financiare që, sipas mediave italiane, është të paktën 1 milion Euro nga transferimi i tij.

Top Channel