Kriza greke, Monti: Athina po gabon, por Berlini të ketë kujdes

“Sigurisht. Nëse situata është kaq e komplikuar, përgjegjësia është më shumë e Athinës sesa e Brukselit. E qeverive të dekadave të fundit dhe e Tsipras e Varoufakis, që në pak muaj, me sjelljen e tyre egocentrike, kanë krijuar simpati me fitoren elektorale”, ka thënë Monti.

Në një intervistë për “Corriere della Sera”, Monti është shprehur kritik edhe ndaj Fondit Monetar Ndërkombëtar, Bankës Qendrore Europiane dhe Bashkimit Europian.

“Këtu ka një ngatërresë. Trojka nuk është Europa dhe jam më i bindur se kurrë që kam bërë gjënë e duhur kur i imponova Italisë atë sforcim që na bëri ta shmangnim Trojkën”, ka thënë Monti.

Në pikëpamjen e atij që njihet si “kryeministri i krizës”, edhe kancelarja gjermane Angela Merkel do të dalë fituese vetëm nëse mban Greqinë brenda euros dhe favorizon marrëveshjen.

“Por nëse krijohet ndjesia se Merkel dhe ministri Schauble nuk e kanë dashur marrëveshjen, atëherë në Europë do të ketë një revoltim të shpirtrave, një skenar dramatik, si për Europën dhe për Gjermaninë”, ka shtuar Monti.

Në vlerësimin e tij, Monti thotë se, dalja e Greqisë nga Eurozona do të ishte një përvojë tërësisht e re për të gjithë.

“Është e vështirë të parashikosh reagimin e tregjeve nëse preket siguria e pakthyeshmërisë së monedhës së përbashkët. Dikush mund të tundohet për të vënë në lojë vende të tjera”, ka shtuar Monti.

Top Channel