Energjia, Gjiknuri: Rritëm arkëtimet me 50%, reduktuam ndjeshëm humbjet

07/07/2015 00:00

Ministri i Energjisë, Damian Gjiknuri bëri publike shifrat e fundit të humbjeve dhe arkëtimeve që në gjashtë-mujorin e parë të këtij viti përbëjnë një total prej 34.3 miliardë lekësh.

“Për periudhën janar-qershor 2015, arkëtimet janë 50% më shumë se 2014, ose krahasuar me 2013 janë 82% më shumë. Kemi rekord historik të humbjeve, 28.6 % në qershor 2015, krahasuar me qershor 2013 që ishte 40%”, deklaroi Gjiknuri.

Dalja e sektorit energjitik nga kriza, siç u shpreh ministri Gjiknuri, i atribuohet aksionit të ndërmarrë nga qeveria një vit më parë për të luftuar abuzimet me energjinë elektrike, por dhe mënyrës se si janë menaxhuar transaksionet brenda sektorit.

“KESH ka kursyer mbi 35.5 milionë euro për shkak të reshjeve dhe mirëmenaxhimit në shitjen, si dhe blerjen e energjisë me çmimin e bursës ndërkombëtare, ndërsa OSHEE ka përfituar 44.8 milionë euro për shkak të operacioneve. Në total, në sektor janë gati 80 milionë euro afarizëm pozitiv”, saktësoi Gjiknuri.

Ministri tha se rritja e likuiditetit ka bërë të mundur deri më tani shlyerjen e 90% të borxhit të akumuluar ndaj HEC-eve private, ose 40 milionë dollarë dhe nisjen e programit të investimeve, kryesisht në sistemin e shpërndarjes, që deri në fund të vitit parashikohet të shkojë në 5 miliardë lekë.

Top Channel