Top Story, Bushati: Nuk ka asnjë ftohje. SHBA dhe Gjermania, komplementarë për ne

09/07/2015 00:00

Kanë kaluar më shumë se 24 orë nga vizita e Angela Merkel në Tiranë, një vizitë e rëndësishme dhe pikënisje e turit të saj ballkanik, ku më pas udhëtoi drejt Serbisë dhe Bosnjes. Vizita pritej me interes, jo vetëm brenda, por edhe jashtë Shqipërisë dhe kjo për faktin se fqinji ynë jugor, Greqia është duke kaluar krizën më të thellë ekonomike prej dekadash. Gjithsesi, për krizën greke u fol pak, por u fol shumë për Ballkanin Perëndimor dhe perspektivën e tij europiane.

Me rëndësi për shqiptarët ishte që vizita nisi në Tiranë, por a është vizita e Merkelit, për më tepër sjellja e saj e re me shqiptarët, një mundësi që nuk duhet humbur? Kjo ishte tema e Top Story me Sokol Ballën këtë të enjte, ku i ftuar përballë analistëve në panel ishte ministri i Punëve të Jashtme, Ditmir Bushati.

Vizita e Merkelit interpretohet prej ministri Bushati, veç të tjerash edhe një përpjekje për të mbajtur vendet e rajonit në perspektivën e qartë europiane dhe larg ndikimit të vendeve të treta.

“Mund të thuhet që Gjermania është donatori kryesor në Ballkanin Perëndimor dhe vizita e Merkel në një pjesë të rajonit bëhet edhe në kontektsin e disa zhvillimeve të rëndësishme me atë se me çfarë po përballet Europa në lindje dhe në jug të saj dhe për shkak të situatës specifike që po kalon Bashkimi Europian dhe Eurozona me krizën greke. Gjermania ka një ripozicionim në këtë kontekst, një kundërpërgjigje dhe një vëmendje ndaj vendeve të Ballkanin Perëndimor. Është po Gjermania që nisi procesin e Berlinit dhe në këtë proces, janë kyçur disa vende dhe disa institucione ndërkombëtare për të lidhur rajonin. Por vizita ishte edhe për të mbajtur vendet e rajonit në perspektivë të qartë europiane, larg influencës së aktorëve të tjerë, që kanë qenë prezencë me investime dhe lidhje të ndryshme në rajon”, tha Bushati.

Kryediplomati shqiptar tha se temat e diskutuar në takimet dypalëshe janë ato që u fol edhe në konferencën e përbashkët për shtyp mes Merkelit dhe Ramës.

“U fol për thellimin e investimeve gjermane në Shqipëri, përmirësimin i klimës së biznesit dhe ndaj investimeve gjermane në veçanti dhe kemi pasur një shkëmbim të pasur për krizën në Greqi, zhvillimet në Maqedoni dhe Kosovë”, u shpreh ai.

Por a e justifikojnë këto trumpetimin që iu dha kësaj vizite, njësoj si ato që u kemi dhënë funksionarëve të lartë të SHBA apo Papës? Për analistin Shpëtim Nazarko, po.

“Merkel në një lloj mënyre është Papa i Europës, për vendin që përfaqëson dhe fuqisë ekonomike që ka nga pas”, tha Nazarko, duke shtuar se investimi më madhor i Berlinit në rajon deri më tani, është për stabilitetin, për të shmangur çdo konflikt të mundshëm në rajon”, tha ai.

Ndërsa analisti tjetër, Skënder Minxhozi u shpreh se rëndësia e vizitës së Merkelit nuk ishte për ato që tha, por sepse ndodhi. “Prezenca e saj është rezultati kryesor i vizitës. Është një mesazh shumë i fuqishëm politik”, vlerësoi ai.

Arjan Vasjari nga ana tjetër vuri në dukje një paradoks, sipas tij.

“Duhet pranuar që ka një paradoks në sjellen e Gjermanisë ndaj Ballkanit. Është e vërtetë që nga 1989 është nga donatorët kryesorë në Ballkan, ku shuma vetëm në Shqipëri kalon 1 mld euro, por Gjermania është futur me vonesë politikisht, këtu i referohem Ballkanit Jugor dhe Perëndimor”, tha ai.

Ministri Bushati vuri theksin te domosdoshmëria e reformave, që vlerësohen si jetike sa i përket procesit të integrimit.

“Duhet të shohim dhe lexojmë këtë vizitë dhe këtë marrëdhënie realisht. Të kuptojmë që rruga jonë është e vështirë. Duhen reforma të brendshme, më e rëndësishmja ajo në drejtësi dhe përmirësimi i marrëdhënieve mes njëri-tjetrit në rajon”, tha Bushati.

Ministri i Jashtëm vlerësoi progresin sa i përket marrëdhënieve në rajon, duke përmendur këtu vizitat respektive, fillimisht të Ramës në Beograd e më pas të Vuçiç në Tiranë.

“Duam të shkojmë së bashku në Vjenë me projektet të përbashkëta në infrastrukturë për të marrë mbështetje konkrete nga pala gjermane. Pra është një proces i dyanshëm, ku ne duhet të bëjmë detyrat e shtëpisë dhe BE duhet të ketë sensin e lartë politik për të mbajtur të gjallë këtë proces”, deklaroi krydiplomati shqiptar.

Azilkërkuesit

Ditët e fundit ka pasur një numër të madh azilkërkuesish shqiptarë drejt Gjermanisë dhe në konferencën me Merkel, kryeministri Rama foli për një zgjidhje, për një dimension social të kësaj krize. Por a do të ketë diçka konkrete?

“Së pari Shqipëria sipas legjislacionit gjerman nuk konsiderohet vend origjine i sigurtë. Kjo lë të hapur këtë. Ne do të kishim pasur dëshirë që të kishim një tjetë vlerësim, në mënyrë që e gjithë procedura të kryhej në një kohë rekord, krahas punës së përbashkët që është duke u bërë në kufi dhe kontrollit të përbashkët që do të bëjmë së bashku me policinë gjermane në Kakavijë dhe Kapshticë, për t’i bërë ballë fluksit që është vënë re në këto dy pika hyrëse. Kemi diskutuar për mundësitë e programeve sesi mund të ndihmohet Shqipëria përsa i përket arsimit profesional. Kemi folur me Merkel për ta krijuar dhe zhvilluar këtë fuqi punëtore, sepse në radhë të parë i bën mirë vendit, për të zhvilluar vendin, e jo më për t’u shfrytëzuar për tregun e punës në Europë”, u shpreh Bushati.

Skënder Minxhozi u ndal tek kriza greke dhe ndikimi që ajo mund të ketë në ekonominë tonë. Ai kërkoi nga ministri Bushati nëse pala shqiptare ka gati një ‘faturë’ për ta dorëzuar në Bruksel në rast të një dalje të mundshme të Greqisë nga Eurozona.

“Kemi diskutuar me kancelaren Merkel mbi implikimet e krizës greke në Shqipëri dhe rajon dhe ka qenë një interesim i drejtpërdrejtë i saj për të mësuar qëndrimin tonë mbi këtë çështje. Kemi avancuar me kërkesat tona ndaj Gjermanisë dhe institucioneve të BE-së sesi problemet e krizës greke mund të rregulloheshin në ekonominë tonë dhe sigurisë që shpërfaq kriza greke, sigurisë energjitike, aq më tepër që një pjesë e investimeve strategjike vihen në pikëpyetje, i vetmi projekt që ka nisur të zbatohet, është TAP, të tjerët janë të gjithë virtualë. Tashmë kemi rrjedhën turke, që Greqia kërkon ta quajë rrjedha turko-greke, por të gjitha planet për sistemin energjitik janë vënë në pikëpyetje dhe kjo sjell pasoja edhe për BE-në. Greqia ëshë një vend që ka çështje dypalëshe të pazgjidhura me një pjesë të mirë të fqinjëve të saj dhe ne e dimë që në situata të vështira, nacionalizmi kthehet në modë. I gjithë ky kontekst ka qenë pjesë e diskutimeve të djeshme me kancelaren Merkel”, u përgjigj Bushati.

Projektet konkrete dhe reforma në drejtësi

Ministri Bushati foli për projektet konkrete në pjesën e dytë të Top Story.

“Kemi folur me kancelaren gjermane për prioritetin tonë për korridorin adriatiko-jonian, ku një pjesë e mirë është e ndërtuar dhe është një projekt i realizueshëm në një afat kohor jo shumë të largët. Jo vetëm për rrugët, por edhe për ndërlidhje me aeroporte e porte, por edhe për degëzimin e TAP-it me IAP. Është folur për arsimin, fushën e arsimit profesional e kështu me radhë”, tha Bushati, duke shtuar se për korridorin adriatiko-jonian është bërë studimi i fizibilitetit.

Në konferencën e përbashkët për shtyp me Merkelin, kryeministri Edi Rama u zotua publikisht se në Kuvend do të kalojë brenda vjeshtës reforma në drejtësi, një reformë delikate, që më shumë sesa numrat kërkon konsensusin.

“Kryeministri ka folur për paketën e masave ligjore që do të kalojë në Parlament brenda vjeshtës, që është në përputhje në planin e masave që Shqipëria dhe BE kanë rënë dakort, që duhet të adresohet, që të konsiderohet për këtë fazë Shqipëria në procesin e integrimit, i përmbushur detyrimi i saj. Në momentin që nisin bisedimet për anëtarësim, vendi kandidat përballet me kapitujt 23-24 që kanë të bëjnë me reformën në drejtësi dhe shtetit të së dtrejtës. Kjo do të jetë një punë në progres dhe në vazhdimësi. Kapituj mbi drejtësinë nuk do t’i ndahen Shqipërisë. Ka disa tregues pozitivë sa i përket reformës, siç është opinioni publik, që mezi e pret dhe shenja inkurajuese pjesëmarrja e opozitës në komisionin parlamentar. Reforma në drejtësi është konsensus dhe jo çështje numrash. Besoj se pjesëmarrja e opozitës do të krijojë një sinjal edhe për Presidentin e Republikës për të qenë më aktiv në këtë proces, sepse Kushtetuta e njeh atë si kryetar në krye të KLD, propozon emrat për Gjykatën e Lartë dhe Gjykatën Kushtetuese. Ka një rol goxha të rëndësishëm në këtë sfidë, por sfida e madhe mbetet mënyra si do të zbatohet paketa ligjore”, tha Bushati.

Ftohja me SHBA? Bushati: Aventurë kush mendon se mund të bëjmë lojra

Një pjesë e opinionit publik interpreton afrimin me Gjermaninë si rezultat i ftohejs me Shtetet e Bashkuara. Por a ekziston vërtetë kjo ftohje?

“Nuk kemi zhvendosje as në politkën e jashtme, as në terminologji. Niveli i marrëdhënieve me SHBA është më i larti i mundshëm. Kujtoj këtu vizitën time në SHBA, firmosjen e partneritetit strategjik mes SHBA dhe Shqipërisë. Fushat e bashkëpunimit dhe plani i veprimit të këtij partneriteti janë të ndërthurura në këto biseda që po zhvillojmë këtu. Shqipëria është një ndër vendet që ka kontribuar krah për krah me SHBA sa i përket sigurisë dhe bashkëpunimi brenda NATO-s ka qenë i shkëlqyer. Javën e ardhshme do të kemi vizitën e Viktoria Nuland në Tiranë, si pjesë e turit të saj rajonal, para pak javësh kishim Hoyt Yee dhe dialogu mes SHBA dhe Shqipërisë mbetet intensiv. Shpresojmë që deri në fund të viti të kemi vizitën e Kerry në Tiranë, si pjesë e vizitës së tij në rajon. E shohim bashkëpunimin tonë me SHBA dhe Gjermaninë komplementar. Do të ishte aventurë për këdo që mund të mendojë se ne mund të bëjmë lojra të mëdha mes dy superfuqive të mëdha botërore”, u përgjigj Bushati.

Për zërat që flasin për një ftohje në marrëdhëniet mes dy vendeve, shkak kanë qenë thirrjet e vazhdueshme të Uashingtonit për dekriminalizimin.

“Ka një komision parlamentar që i është zgjatur mandati, ka një nismë të mazhorancës për të ecur përpara në këtë drejtim. Është një çështje që ngërdhen etikën, vullnetin, çështjen kushtetuese, ligjore, të drejtat themelore të njeriut dhe besoj se ka një dakortësi qëndrimesh edhe me ambasadën amerikane këtu në Shqipëri për të ecur përpara në këtë drejtim dhe për të pasur një jetë politike më të shëndetshme sa i përket legjislaturës tjetër dhe zyrtarëve të lartë të institucioneve publike”, tha Bushati.

Në fund, Bushati tha se qeveria mirëpret kritikat dhe mendimet e kryediplomatit amerikan në Tiranë dhe se asnjëherë nuk do të mundohet të flasë apo krijojë një përçarje mes asaj që quhej nga qeveria e mëparshme “Rruga e Elbasanit” dhe Uashingtonit”.

Top Channel