Mbërrin i nxehti afrikan, deri në fundjavë temperaturat do të ngrihen

“I gjithë vendi ynë është përfshirë tashmë nga aktiviteti i anticiklonit afrikan, dhe masat vijnë të nxehta. Duke vijuar nga dita e sotme e deri ditën e diel, vendi dhe gjithë Ballkani do të mbetet i përfshirë nga këto masa të nxehta afrikane. Parashikohet në vendet malore temperatura të arrijë në vlerat 35 gradë Celcius. Në vendet e ulëta dhe bregdetare, nesër (e enjte) deri në 38, dhe ditën e diel parashikohet të kapë vlerat 39 e 40 gradë Celcius. Qytete më të nxehta do të jenë Shkodra, Lezha, Tirana, Gjirokastra dhe Berati”, thotë Rezarta Xhakollari, nga Shërbimi Meteorologjik Ushtarak.

Por këto temperatura që maten në hije perceptohen dy deri në tre gradë më shumë nga trupi i njeriut në ambient të hapur, për shkak të lagështirës që sjellin me vete masat ajrore.

“Këto janë temperatura që regjistrohen në kafazin meteorologjik, pra në hije, por është e vërtetë që temperatura e perceptuar nga njeriu rezulton disa gradë më tepër, dhe dihet dhe lagështia në ajër”. Gjatë rrugës dhe kushteve të tjera natyrore, sidomos dhe kryeqyteti që është dhe më i populluar, asfalti, makinat, ndërtimet, bëjnë të mundur që të rezultojë qyteti më i nxehtë dhe të jetë më problematik për qytetarët”, thotë Xhakollari.

Ditën e diel masat ajrore afrikane pritet të tërhiqen nga Gadishulli i Ballkanit çka pritet të sjellin e një rënie të lehtë te temperaturave deri në 2 gradë, por gjithsesi do të ketë mot të kthjellët e të nxehtë. Meteorologët shpjegojnë se këto temperatura janë normale, duke iu referuar muajit dhe stinës ku jemi.

Gjithsesi në këto dite të nxehta këshillohet reduktimi i lëvizjeve, konsumim sa më shumë i ujit dhe i lëngjeve nga qyetaret. Më shumë kujdes duhet treguar me të moshuarit, fëmijët e vegjël dhe gratë shtatzëna.

Top Channel