Për shkak të një defekti teknik, trageti “AF Marina” i linjës Ankona-Durrës ka ndërprerë udhëtimin, duke u kthyer me ndihmën e rimorkiatorëve në portin e nisjes.
E ndërsa paraditen e sotme Kapiteneria e Portit të Durrësit bëri të ditur se është gjetur zgjidhja dhe udhëtarët do të udhëtojnë në mbrëmje drejt Durrësit nga porti i Barit, situata mes pasagjerëve të tragetit “Marina” është shqetësuese.
Nga komunikimi me disa prej tyre, mësohet se nuk u është vënë në dispozicion asnjë mjet për të shkuar në Bari, ndërsa u janë ofruar dy mundësi: të marrin paratë e biletave dhe të vijojnë vetë udhëtimin, ose të shkojnë nga Ankona deri në Bari me mjetet e tyre ose mjete të tjera të transportit, për të udhëtuar më pas drejt Durrësit me tragetin e së njëjtës kompani.
Kjo ka shkaktuar konfuzion mes pasagjerëve, një pjesë e të cilëve dyshojnë se po mashtrohen nga kompania dhe nuk e lënë tragetin, duke bllokuar edhe pasagjerët e tjerë që të marrin automjetet e parkuara brenda në traget. Disa qindra udhëtarë gjenden ende në Ankona pa marrë zgjidhje për situatën e tyre.
Në muajin maj, një tjetër traget i kompanisë “Adria Ferries” u përfshi nga flakët pak pasi kishte dalë nga porti i Barit me destinacion Durrësin.
Top Channel