Greqi, seanca për miratimin e draftit të dytë. Protesta në sheshin Sintagma

Në shesh janë mbledhur rreth 500 persona, mes të cilëve mësues të shkollave private të gjuhëve. “Gjuhët e huaja = zhvillim”, shkruhet në një prej parullave, “Rritja me 23% e TVSH-së = varfërim”, thuhet në një tjetër.

“Grekët janë të parët në Europë që ndjekin mësime të gjuhëve të huaja dhe shkurtimet e imponuara nga Europa godasin grekët e rinj të një gjenerate të tërë”, ka deklaruar njëri prej mësuesve.
Për momentin situata në sheshin Sintagma është e qetë dhe nuk ka gjurmë të anarkistëve, por me kalimin e orëve është rritur prania e forcave të policisë.

Këto të fundit janë shtuar pasi në Parlament kanë nisur debatet mbi paketën e dytë të reformave të kërkuara nga BE për zhbllokimin e financimeve dhe shmangien e falimentimit.

Ndërkohë, votimi i së mërkurës cilësohet si një test për qeverinë Tsipras pasi pritet përsëri rebelim i deputetëve të krahut marksist brenda gjirit të radikalëve të majtë, midis tyre ish-ministrat e shkarkuar dhe kryetarja e Parlamentit, të cilët në diskutimet e tyre kanë thënë se nuk do të votojnë projektligjet përkatëse.

Paketa e dytë e masave që vlerësohet se do të marrë shumicen e votave pasi do të aprovohet edhe nga deputetët e opozitës, perveç Agimit të Arte dhe Partisë Komuniste, përmban dispozitat për Kodin e Procedurës Civile si dhe dispozitat për bankat.

Sipas burimeve qeveritare, nëse numri i deputetëve që do të rebelohen do të jetë më i madh se ai i javës së kaluar, kur 39 ligjvënës të Syrizas kundërshtuan ose abstenuan, atëherë kryeministri Tsipras ka shumë mundësi në shtator të shpallë zgjedhje të reja, në mënyrë që të spastrojë grupin e tij parlamentar.

Siç është shprehur të mërkurën zëdhënësja e qeverisë, brenda Syrizas ka dy grupe me bindje të ndryshme dhe divorci duket se është i pashmangshëm.

Top Channel