Serie A, kampionati ndizet që në javët e para. Derbi i Milanos në javën e 3-të

Kjo, sepse shorti i hedhur këtë të hënë ka përcaktuar një ndeshje të konsideruar të madhe që në javën e parë, ajo që do të luhet në Firence mes Fiorentinës dhe Milanit, ndërkohë që kampionët në fuqi të Italisë, Juventus, do të presë në shtëpi Udinesen.

Ja kalendari i javës së parë:
Empoli-Chievo
Fiorentina-Milan
Frosinone-Torino
Inter-Atalanta
Juventus-Udinese
Lazio-Bologna
Palermo-Genoa
Sampdoria-Carpi
Sassuolo-Napoli
Verona-Roma

Por dueli i Firences nuk është asgjë, krahasuar me përballjet që na dhuron java e dytë dhe ajo e tretë e Serie A. Fillimisht është supersfida Roma-Juventus, që vitin e kaluar ishin të dytët dhe të parët respektivisht, ndërsa java e tretë do të ndizet nga derbi i Milanos.

Inter-Milan në “San Siro” do të jetë e para mes përballjeve derbi, pasi të tjerat mes dy skuadrave të të njëjtit qytet do të luhet si në vijim: Java e shtatë me Chievo-Verona; java e 12-të me Juventus-Torino, e në të 13-n sfida e kryeqytetit Roma-Lazio. Vetëm në javën e 18 do të luhet Genoa-Sampdoria.

Ndeshjet e tjera të forta do të zhvillohet në javën e katërt, me Napoli-Lazio, dy skuadra që vitin e kaluar luftuan deri në fund për të siguruar biletën e fundit në Champions League. Napoli do të presë më tej Juventusin në “San Paolo” për javën e gjashtë, kurse vetëm një javë më vonë do të vizitojë Milanin. Java e tetë dhuron atë që konsiderohej deri pak vite më parë si “derbi i Italisë” (para se Juventus të binte në Serie B) ose sfidën mes Interit dhe Juventusit në “San Siro”. Në javën e nëntë do të përballen Fiorentina me Romën.

Juventus-Milan, një duel mes ekipit më të titulluar në Itali dhe atij italian më të suksesshëm në Europë do të jetë në javën e 13, që pasohet një javë më vonë me sfidën Napoli-Inter. Vetëm në javën e fundit do të luhet përballja mes Romës dhe Milanit, e para në “Olimpico”, ndërsa për t’i dhënë fund kampionatit në “San Siro”.

Top Channel