Zvicër, emigranti që u bë ambasador

30/07/2015 00:00

Naim Malaj është njëri prej atyre mijërave shqiptarëve të Kosovës i cili emigroi në Zvicër si pasojë e genocidit serb.

Fillimisht do të punonte si asistent social e me kalimin e viteve fitoi të drejtën për të qenë shtetas zviceran. Malaj do të emërohej si ambasador i Kosovës në Zvicër. 7 vjet pas pavarësisë së Kosovës, ambasadori i parë i Kosovës në Zvicër, ka vendosur të lërë postin e tij.

Televizioni shtetëror zviceran ka përgatitur një kronikë speciale me rastin e dorëheqjes nga posti i ambasadorit Malaj në Bernë. Kronika televizive nis me koktejlin  diplomatik në selinë e Vatikanit në Bernë, një ceremoni që zvillohet me rastin e largimit të ambasadorëve në Zvicër. Këtë vit është radha e përfaqësuesit të Kosovës.
 
“Të them të drejtën, kur më propozuan të jem ambasador, ndjeva drojë se thoja se ambasadorët nuk janë si gjithë të tjerët”, thotë Malaj.

Gazetari zvicerian thotë se  Naim Malaj nuk është diplomat si të tjerët. Ai vjen në Zvicër si refugjat në vitin 1990, pasi kishte kaluar 4 vite në burgjet serbe. Shumë shpejt ai aktivizohet në Universitetin Popullor Shqiptar të Gjenevës .

“Edhe para se të merrja shtetësinë zvicerane e ndjeja veten qytetar të këtij vendi. E njoh mentalitetin, më pëlqen mënyra e të bërit politikë, më pëlqen modestia e politikanëve, thjeshtësia e këtij vendi”, shprehet Malaj.

Deputeti i parlamentit dhe kryetar i komisionit për politikë të jashtme, Carlo Sommaruga, dha këtë koment për ambasadorin Malaj: “Mendoj se ka pasur dy prioritete të rëndësishme që ka përmbushur Naim Malaj në Zvicër. Së pari, lidhja e marrëdhënieve midis shtetit të Kosovës dhe shtetit të Zvicrës. Është me rëndësi se ai i njihte mirë të dyja realitetet dhe e dyta arriti që të bënte të mundur pranimin dhe njohjen sa më të mirë të komunitetit kosovar në Zvicër, si në nivelin politik ashtu edhe në atë social”.    

Në fund të kronikës, gazetarti zviceran thotë se “pas gjashtë vjetësh pune të palodhshme në petkun e ambasadorit në Zvicër, Naim Malaj e heq këtë petk me ndjenjën e detyrës së përmbushur”.

Top Channel