Hashashi, misioni më i fundit i ushtrisë italiane

Në një laborator të vendosur nën masa të rrepta sigurie në afërsi të qytetit të Firences dhe nën komandën e gjeneralit Giocondo Santoni, qindra anëtarë të ushtrisë italiane janë duke punuar me rritjen e hashashit.

Në laborator janë mbjellë qindra bimë cannabis sattiva të llojeve të ndryshme dhe objektivi është prodhimi i 100 kilogramëve.

“Shpresojmë ta kemi gati prodhimin në fund të vitit, të kemi gati 100 kilogramë, që është dyfishi i asaj që importojmë aktualisht nga Holanda”, thotë gjenerali Santoni.

Hashashi do të përdoret i gjithi për qëllime mjekësore. Në vitin 2007 Italia legalizoi përdorimin e kësaj bime për t’u lehtësuar dhimbjet pacientëve me kancer, sklerozë dhe sëmundje të tjera kronike.

Por megjithëse është e lejuar, konsumi nuk është rritur.

“Vitin e fundit kërkesa ishte më e larta e regjistruar ndonjëherë duke krijuar dy probleme; e para, nuk kemi sasinë e nevojshme të hashashit dhe e dyta, pjesa më e madhe e mjekëve nuk e dinë ose nuk e kanë kuptuar që është legalizuar dhe është e ligjshme dhënia e tij me recetë për pacientët”, thotë Marco Ternelli, një farmacist italian që shet marijuanë holandeze që prej vitit 2013.

Top Channel