Parandalohet në Tiranë një atentat me minë të telekomanduar, dy në pranga

04/08/2015 00:00

Policia e Tiranës ka parandaluar një vrasje dhe ka prangosur dy persona që po përgatisnin sulmin ndaj një personi tjetër duke përdorur minë me telekomandë.

Strukturat e Krimeve të Rënda prangosën shtetasit Juljan Shorja, 29 vjeç, lindur në Durrës dhe banues në Tiranë, i dënuar më parë për vjedhje dhe shtetasen 26-vjeçare me inicialet R.T., lindur dhe banuese në Tiranë.

Sipas policisë, Julian Shorja po përgatiste një minë me telekomandë për llogari të shtetasit me inicialet Sh.P. Ky i fundit, në bashkëpunim me shtetasin M.A., do ta përdornin këtë lëndë për eleminimin e shënjestrës së tyre.

Policia nuk publikon identitetin e objektivit, ndërkohë që janë shpallur në kërkim shtetasit Sh.P. dhe M.A., ndërsa në cilësinë e provës materiale janë sekuestruar në banesën e shtetasit Julian Shorja dy kapsolla detonatorë, municione luftarake dhe lëndë narkotike e dyshuar hashash.

Top Channel