Dyndje shqiptarësh për azil. Raporti: Kërkojnë azil më shumë se sirianët në luftë civile

Edhe në total, përsa i përket Gjermanisë, numri është rritur me gati dyfishin, ose më saktë rreth 125% më shumë krahasuar me të njëjtën periudhë të vitit 2014.

Nga këto, bëjnë me dije statistikat zyrtare të publikuara gjatë ditës së mërkurë, më shumë se 60.000 i përkasin shqiptarëve nga Kosova dhe Shqipëria krahasuar me rreth 4800 kërkesa të tilla të bëra gjatë së njëjtës periudhë të një viti më parë.

Por, sipas të njëjtave statistika, të 27 mijë azilkërkuesit e vendeve nga Serbia, Maqedonia dhe Mali i Zi janë gjithashtu në shumicë shqiptare. Vetëm për muajin korrik, vijon më tej raporti, azilkërkuesit me vend origjine Shqipërinë numëron 7547 persona, 29% më tepër krahasuar me të ardhurit e qershorit të këtij viti.

Në renditje vendi ynë është i treti, pas Sirisë së trazuar nga lufta dhe Kosovës e që së bashku me këtë të fundit ia kalojnë edhe Sirisë, Eristresë e Pakistanit çka dëshmon që nga vendet e Ballkanit po ikin çdo ditë e më shumë njerëz. Por, si kombësi, shqiptarët janë azilkërkuesit më të shumtë se gjithë të tjerët.

Një tjetër shqetësim që vërehet në raport është edhe riaplikimi, ku për periudhën në fjalë numërohen 504 të tilla vetëm nga Shqipëria e 2938 nga Kosova.

Raporti vjen në një moment kur ministri i Brendshëm, Thomas de Maiziere kërkoi të rishikoheshin parashikimet mbi ardhjen e emigrantëve, pas sipas tij, nuk mund të qëndrojë më parashikimi i 450 mijë të ardhurve, por në gati 800 mijë të tillë.

Komisioni i BE-së gjithashtu gjatë një konferencë për shtyp bëri me dije se numri gjithnjë e në shtim i azilkërkuesve nuk është më një çështje që i takon vetëm vendeve si Gjermania, Greqia apo Italia, por gjithsecili nga vendet anëtare të unionit duhet të bëjë lëvizje më të guximshme.

Kjo është edhe tema e ditës për takimin e caktuar të mbahet në Greqi në datat 25 dhe 26 gusht. Do të rishikohet mundësia e ndarjes së atyre që zgjedhin emigracionin për të kërkuar azil dhe të tjerëve që e nisin këtë aventurë bazuar në nevojat ekonomike, një ndarje që ndoshta do i jepte një dorë edhe autoriteteve në përshpejtimin e procedurave dhe përballjen më efektive me emigrantët.

Në Zyrën Federale të Kërkesave për Azil në Gjermani vetëm për 7-mujorin e vitit 2015 janë paraqitur mbi 218 mijë aplikime nga të cilat më shumë se 13 mijë janë riaplikime.

Top Channel