Pranimi i refugjatëve, vetëm Gjermania në kuotën e 1% të popullsisë

Ky është titulli i artikullit të britanikes “the Guardian”, sipas së cilës numri i azilkërkuesve, që është bërë publik nga ministri i Brendshëm Thomas De Maiziere, korrespondon me afro 1% të popullatës së vendit.

Kaq është edhe sasia, që duhet të pranojë secili vend anëtar për t’iu afruar Gjermanisë. Nga të dhënat zyrtare të vitit 2014 – vijon artikulli, – vetëm Suedia i afrohet kësaj shifre nga të 28 vendet anëtare të Bashkimit Europian.

Por gjithsesi – thuhet më tej, – numri i azilkërkuesve nuk nënkupton që është i njëjtë me atë të refugjatëve, që u jepet e drejta të jetojnë në vend. Kjo sepse, nga numri i azilkërkuesve gjatë vitit të kaluar në mbarë unionin, vetëm 45 për qind u pranuan dhe këtu e para renditet Suedia, që pranoi 77% të tyre, krahasuar me vetëm 42%, që pranoi shteti gjerman.

Gjatë muajit korrik, Gjermania ka marrë 37.531 kërkesa për azil – shkruan artikulli, – një rritje prej 93% krahasuar me të njëjtin muaj të një viti më parë. Pavarësisht se numrin më të madh të kërkesave në mbarë Europën e përbëjnë ata që u largohen konflikteve dhe varfërisë në Afrikën e Veriut dhe Lindjen e Mesme, një sasi tjetër sërish e lartë u përket vendeve të tjera.

40% e aplikimeve në Gjermani gjatë muajit të shkuar – shkruan “the Guardian”, – u përket azilkërkuesve që vijnë nga Shqipëria, Bosnje-Hercegovina, Kosova, Maqedonia, Serbia dhe Mali i Zi.

Gjithsesi – mbyllet artikulli, – vendet europiane nuk i janë përmbajtur premtimit për të marrë gjithsecili nga 40 mijë emigrantë në territoret e tyre, por janë mbyllur në shuma të vogla që nuk i afrohen 1% të popullatës.

Bazuar në këtë algoritëm, Britania e Madhe ka pranuar vetëm 0.003% dhe përbën vendin e dytë që ka pranuar më pak, pas Hungarisë, që ka refuzuar të presë refugjatë. Edhe më pak madje, sesa vende më të vogla si Luksemburgu, që ka pranuar 0.064%, Qipro me 0.028% dhe Irlanda me 0.024%.

Top Channel