Presidentja Jahjaga pret ambasadorin Delawie

Ai të premten zhvilloi takimet njohëse me autoritetet qendrore të Kosovës, Presidenten Atifete Jahjaga dhe kryeminsitrin Isa Mustafa.

Në një ceremoni solemne në Presidencën e Kosovës, ku u rreshtua garda e FSK-së, ambasadori Delawie i dorëzoi letrat e tij kredenciale.

“Unë kam besim të fortë që liderët e Kosovës do të vazhdojnë të punojnë së bashku për sundimin e ligjit, për forcimin e sigurisë rajonale, për ndërtimin e institucioneve demokratike dhe do të vazhdojnë punën për të krijuar mundësi punësimi për të gjithë. Unë gjithashtu pres të takoj të rinjtë e Kosovës si dhe të njihem me sfidat me të cilat ballafaqohet Kosova”, u shpreh ambasadori Delawie.

Presidentja e Kosovës, Atifete Jahjaga siguroi ambasadorin amerikan se Kosova do të vazhdojë përpjekjet drejt ndërtimit të shtetit të së drejtës me përspektivë për të gjithë qytetarët e saj.

“Kosova e ka dëshmuar që është shtet që i merr seriozisht të gjitha obligimet karshi partnerëve ndërkombëtarë, të cilët janë shumë të rëndësishëm në përballjen me sifdat globale”, u shpreh Presidentja Jahjaga.

Ndryshe nga temat politike, në këtë konferencë për media ku gazetarët nuk patën rastin të bëjnë pyetje, ambasadori amerikan tregoi për dëshirën që ai dhe familja e tij, të pranishëm në takim, kanë për t’i vizituar bukuritë natyrore të Kosovës.

“Bashkëshortja ime dhe dy fëmijët e mi janë të lumtur që kanë mundësi të shohin jo vetëm vendet historike e kulturore në Kosovë, por edhe të eksplorojmë bukuritë natyrore. Ne planifikojmë që t’i nisim shëtitjet duke filluar nga kjo fundjavë”, u shpreh ambasadori amerikan.

Me të përfunduar takimi, ambasadori Delawie i shoqëruar nga Presidentja Jahjaga, ecën përgjatë sheshit “Nënë Tereza” në Prishtinë. Ata bënë një ndalesë të parashikuar pranë tendave të kultivuesve të mjedrës, projekt ky i mbështetur nga USAID.

Top Channel