Samiti i Vjenës, ambasadori austriak: Ja synimet e nismës “Merkel”

22/08/2015 00:00

Thomas Schnoll, ambasador i Austrisë në Shqipëri, në një intervistë për Top Channel shpjegon se çfarë pala austriake synon të arrijë nëpërmjet samitit të vendeve ballkanike në Vjenë, i cili do të zhvillohet në 27 gusht.

“Kjo nismë e nisur nga kancelarja Angela Merkel vitin e shkuar ishte shumë e rëndësishme, sepse na tregon që i gjithë rajoni i Balkanit Perëndimor mbetet në vëmendjen dhe fokusin e politikave të Bashkimit Europian. Ky ishte një sinjal i rëndësishëm politik, por tani ky hap i parë është i mbyllur dhe tani në Vjenë ne duam të kemi veprime konkrete përsa i përket rajonit, duke prodhuar kështu rezultate konkrete. Prandaj ne mblidhemi të gjithë së bashku në Vjenë. Në Austri, duam të shohim rezultate konkrete. Janë disa. Jemi duke punuar shumë si organizatorë që çfarë do të diskutohet të shikojë dritën e zbatimit. I gjithë samiti do të këtë si moto lidhjen-ndërlidhjen. Sepse duam ta shohim Ballkanin Perëndimor të gjithin së bashku si një rajon i vetëm. Nëse një investitor i huaj vendos të investojë jashtë është me rëndësi për atë të investojë në një zonë me 20 milionë njerëz sesa në një vend me 3 milionë njerëz. Dhe për këtë duhet të krijojmë kushtet e duhura duke investuar në infrastrukturë. Kjo është edhe arsyeja për të cilën shpresojmë që në Vjenë do të nisim një proces, duke krijuar autostrada të reja, hekurudha përfshirë përmirësimin dhe modernizimin e rrugëve ekzistuese”, tha Schnoll.

Krahas infrastrukturës, ambasadori Austrisë thotë se do të diskutohen edhe projekte të tjera.

“Do të jenë edhe projekte të reja që edhe ato kanë rëndësinë e tyre. Në këndvështrimin e Austrisë, shoqëria civile merr rëndësi. Po zhvillohet një punë konkrete për programet e shkëmbimit të studentëve. Në këndvështrimin tim përsa u përket studentëve shqiptarë, ata janë të prirur të shkojnë e të studiojnë në vendet anëtare të BE-së sesa në vendet fqinje. Nuk duhet të vazhdojë më kështu. Ju duhet të njiheni me fqinjët tuaj, gjeneratën e re në këto vende, duke ndërtuar kështu besim, që do të minimizojë paragjykimet që mund të ekzistojnë. Kjo është e rëndësishme dhe prandaj mendoj se ky shkëmbim studentësh është tejet i rëndësishëm. Austria i kushton një rëndësi të veçantë zhvillimit ekonomik në rajon dhe problemeve që lidhen me papunësinë. Austria ka një model të suksesshëm që e mban papunësinë tek të rinjtë në nivele të ulëta nëpërmjet asaj që e quajmë sistemi dual-profesional. Ky mbase ose mund të jetë modeli që mund të transferohet dhe të përbëjë interes për vendet e rajonit”, shtoi ai.

Drejtori politik i Ministrisë së Jashtme të Austrisë, Jan Kickert dhe drejtori për Ballkanin Perëndimor, Jahann Sattler disa javë më parë kanë vizituar Shqipërinë dhe janë takuar me kryeministrin Rama dhe liderin e opozitës Basha. Diplomati austriak tregon qëllimin e kësaj vizite.

“Ishte kryesisht në kuadër të përgatitjeve për konferencën në Vjenë. Ata kanë patur gjithashtu takime edhe në vende të tjera të rajonit. Kjo ishte arsyeja përse ata nuk u takuan vetëm me kryeministrin, por edhe me ministrin e Jashtëm, Bushati, i cili është koordinatori politik në këtë proces. Pra, u fol për finalizimin e konferencës. Zoti Kickret e përdori këtë mundësi për të marrë një fotografim të situatës së brendëshme në Shqipëri, prandaj zhvilloi edhe një takim me zotin Basha”, u shpreh ambasadori austriak.

Për këtë vizitë është raportuar në media se këta zyrtarë austriakë i kanë dorëzuar kryeministrit 6 dosje me të dhëna se një zyrtarë i lartë është përfshirë në afera korruptive. A është e vërtetë një gjë e tillë?

“Jam këtu që prej dy vitesh dhe jam i habitur sesi thashethemet në Vjenë, por veçanërisht këtu… Është për të qeshur. Ju siguroj se asgjë e kësaj natyre nuk është e vërtetë dhe asgjë nuk i është dorëzuar askujt”, deklaroi ai.

Top Channel