“E hëna e zezë” e Kinës po zgjatet, duke vijuar edhe gjatë kësaj të marte, e duke sjellë një tjetër ditë tensionesh për tregjet ndërkombëtare të aksioneve.
Bursa e Shangait u çel me një kredhje të re prej 6,41%, një dite pas humbjes me 8,49%, që shkaktoi tronditje të tregjeve në mbarë globin, ashtu siç lëkundi sërish edhe çmimet e naftës.
Me kalimin e orëve pati, sidoqoftë, një ngritje të lehtë, për të qëndruar në nivelin e 4,08%. E njëjta gjë ndodhi edhe me bursën e dytë më të madhe në vend, atë të Shenzenit, me humbje fillimisht në 6,79%, por më pas rikuperoi disi duke ndaluar në 5,47%.
Banka Qendrore e Kinës është përpjekur të ndërhyjë për stabilizimin e gjendjes përmes injektimit të fondeve të reja prej 150 miliardë juanësh apo 22,43 miliardë dollarë.
Megjithatë, efektet e “tërmetit” të tregjeve të nisur prej saj vazhdojnë. Pas humbjeve të para, indeksi japonez arriti me vështirësi të kthehej në terren pozitiv, ndërsa tani është sërish në rënie me 0,42%.
Në bursat europiane, tronditja e djeshme rrezikoi djegien e gati 450 miliardë eurove. Rënie të madhe shënuan edhe tregjet e aksioneve në Shtetet e Bashkuara, ku që në minutat e para të shkëmbimeve, “Doë Jones”-i ra me gati 5%.
Rrudhje pati dhe kuotimi i arit të zi. Çmimi i naftës bruto ra mbi 4 për qind, duke shënuar nivelin më të ulët në 6 vitet e fundit. Ekonomia në rritje e Kinës ka qenë tregu kryesor për shumë mallra gjatë viteve të kaluara. Por, disa goditje të fundit, si rënia e tregjeve financiare dhe zhvlerësimi i papritur i monedhës, i kanë bërë investitorët të vënë në pikëpyetje gjendjen e ekonomisë së dytë më të madhe të globit.
Muajt e fundit, qeveria kineze ka ndërhyrë disa herë në tregjet financiare, në përpjekje për të ruajtur “momentin” për ekonominë. Megjithatë, zhvlerësimi i juanit nga Banka Qendrore dy javë më parë ngjalli shqetësime të reja në mbarë botën se, gjendja mund të jetë më e keqe nga sa mendohej fillimisht.
Një monedhë kombëtare më e lirë ul çmimet e eksporteve kineze, duke i bërë më joshëse për firmat globale, e kjo u konsiderua si shenjë e vështirësive me të cilat mund të jetë duke u përballur vendi.
Top Channel
