Bota rrezikon krizën e ujit; Shkak, ngrohja globale dhe rritja e popullsisë

29/08/2015 00:00

Ngrohja globale dhe rritja e numrit të popullsisë janë faktorët kryesorë që po e çojnë botën drejt një krize për furnizim me ujë.

Të paktën këto janë të dhënat e fundit që ka publikuar Instituti i Resurseve Botërore, të cilët kanë arritur në përfundimin se kërkesa për ujë në botë, me shumë gjasë do të rritet edhe më shumë për shkak të rritjes së shkallës së demografisë. Kjo popullatë në rritje do të kërkojë konsum edhe më të madh, bujqësia po ashtu, fermat, kompanitë e ndryshme apo hidrocentralet. E si pasojë e mungesës së elementit bazë të jetës në tokë, do të prishet një ekosistem i tërë paralajmëron World Resourses Institute.

Shterimi i burimeve të ujit është faktori kryesor që sjell mungesën, pasi ndryshimet klimatike pritet të kthejnë në thatësirë shumë zona. Teksa disa rajone do të përballen me reshje masive dhe përmbytje, të tjera do të përballen me një thatësirë ekstreme. Ndaj Instituti Botëror i Resurseve, ka hartuar një listë me 33 vendet që do të përballen më së shumti me krizën për ujë.

16 shtetet e para janë ato të Lindjes së Mesme, e ndërsa direkt pas tyre vijon Maqedonia për t’i lënë vendin Turqisë , Greqisë, Spanjës e të tjera vendeve. Ngjyra e kuqe në hartë dhe nuancat që i afrohen asaj, flasin për një rrezikshmëri më të lartë pëballë këtij fenomeni. Përgjithësisht gadishulli i Ballkanit është i ngjyrosur me të kuqe, çka flet për një ekspozim më të madh ndaj mungesës së ujit në vitet në vijim. Sipas disa ekspertëve të ndryshimeve klimaterike, e drejta themelore e njeriut për të konsumuar ujë të pastër, përbën një nga sfidat më të mëdha në klimën e tanishme.

Top Channel