Kriza e refugjatëve, komisioneri Avramopoulos në Kalais

Bëhet fjalë për portin nga ku nisen tragetet për në Dover të Britanisë e ku hyrja e Eurotunelit që çon në Londër mësyhet vazhdimisht nga refugjatët.

Atje, komisionerin grek e presin kryeministri francez Manuel Valls dhe ministri i Brendshëm, Bernard Cazeneuve. Blloku duket se ka nisur të lëvizë.

BE-ja thirri bisedime emergjente mbi mënyrat sesi të menaxhohet kriza në përshkallëzim e emigracionit. Presidenca e saj njoftoi 14 shtatorin si datën kur ministrat e Brendshem të 28 vendeve anëtare do të zhvillojnë takimin e jashtëzakonshëm, me në fokus krizën e refugjatëve që sa vjen e thellohet.

Qindra vetë u mbytën ditë më parë në Mesdhe. 71 trupa të pajetë u gjetën të ngjeshur në kamionin e braktisur në një austostradë pranë Vjenës. Vetëm muajin e kaluar, kufijtë e Bashkmit Europian i kaloi një numër rekord emigrantësh: 107.500.

Situata e fenomenit të emigracionit brenda dhe jashtë unionit ka marrë kohët e fundit përmasa të pa regjistruara më parë, thuhet në deklaratën e lëshuar me rastin e organizimit të mbledhjes urgjente.

Axhenda e bisedimeve do të përfshijë bashkëpunimin e brendshëm, luftën ndaj trafikantëve dhe politikat e riatdhesimit. Gjermania, Franca dhe Britania e kanë bërë të qartë mendimin e tyre: BE-ja duhet të krijojë një listë vendesh të origjinës së sigurtë, çka do të lejojë kthimin e menjëhershëm të një pjese të emigrantëve.

Të shtunën, sekretari i përgjithshëm i Kombeve të Bashkuara, Ban Ki Moon deklaroi se duhet bërë shumë më tepër për parandalimin e vdekjeve të njerëzve që po vërshojnë drejt Europës dhe apeloi për një “përgjigje politike kolektive” ndaj krizës.

Tronditje të thellë, siç pohoi dhe vetë ai, i kishte shkaktuar gjetja e 71 të vdekurve në kamion, një prej treguesve më të qartë të brutalitetit të trafikantëve dhe trajtimit çnjerëzor që u bëhet njerëzve të përballur me situata të tmerrshme edhe përpara mbërritjes në Europë.

Top Channel