Nxënësit shqiptarë nga Maqedonia edhe gjatë vitit shkollor 2015-2016 do të mësojnë nga librat e autorëve maqedonas, ku nuk mungojnë përmbajtjet fyese e përbuzëse për popullin e tyre shqiptar.

Kështu, për shembull, në librin e gjeografisë për vitin e parë të shkollave të mesme, shkruhet se shqiptarët e Maqedonisë e kanë prejardhjen nga Shqipëria veriore dhe e mesme, ndërsa ata që e llogarisin veten si autoktonë janë maqedonas të cilët gjatë Perandorisë Osmane kanë pranuar fenë islame dhe gradualisht janë shqiptarizuar.

Profesori i gjeografisë, Burim Aliu thotë për mediat se këto përmbajtje janë fyese dhe irritojnë shqiptarët. Aliu pohon se atij dhe kolegëve të tij nuk u mbetet gjë tjetër përpos t’i anashkalojnë këto pjesë ofenduese gjatë orëve të mësimit.

Duket se teksteve shkollore për nxënësit shqiptarë nuk u mjaftojnë këto përmbajtje fyese, por ato përmbajnë edhe gabime gjuhësore.

Edhe Samet Jahiji, kryetar i Lidhjes së Arsimtarëve Shqiptarë, dega Kumanovë, thotë për mediat se librat kanë gabime skandaloze, duke filluar nga përkthimi e deri tek përmbajtjet fyese dhe të shtrembëruara.

Dhe nga viti në vit, sa herë që vjen shtatori, mes shqiptarëve të Maqedonisë rihapet tema për përmbajtjet dhe gabimet skandaloze të librave shkollorë, nga të cilët mësojnë nxënësit shqiptarë.

Gjatë këtij debati, ku nuk mungon as zëri i ministrit shqiptar të Arsimit, Abdylaqim Ademi, thuajse të gjithë përsërisin atë që kanë thënë vite me parë: arsimtarët numërojnë gabimet dhe pjesët ofenduese; ndërsa ministri Ademi premton se problemi do zgjidhet, por pa treguar se kur dhe se si.

Top Channel