Antikanabis, asgjësohen 7724 rrënjë në mbarë vendin. Dy të arrestuar, një në kërkim

Si pasojë e intensifikimit të punës së specialistëve kundër narkotikëve në Komisariatin e Elbasanit, nga operacioni i kontrollit të territorit të kryer në zonat përreth Elbasanit, janë gjetur të kultivuara 537 rrënjë të dyshuara kanabis në tokën e tij në fshatin Marinëz, të cilat u asgjësuan me djegie, me përjashtim të një sasie të caktuar të marrë në cilësinë e provës materiale dhe për ekzaminime laboratorike.

Veç 50-vjeçarit Andrea Gjini, blutë e Elbasanit vijojnë punën edhe për kapjen e shtetasit A.K., 24 vjeç, banues po në Belsh, ndërkohë që materialet hetimore për këtë rast i kanë kaluar Prokurorisë së Rrethit Gjyqësor Elbasan për veprën penale të “kultivimit të bimëve narkotike”.

Shkodër, 3371 rrënjë të asgjësuara nga 19 parcela

Operacionet antihashash kanë vijuar edhe në Qarkun e Shkodrës, ku janë asgjësuar 3371 rrënjë bime narkotike në total, por të shpërndara në disa fshatra të Shkodrës dhe të Pukës. Lënda narkotike e dyshuar kanabis ishte kultivuar në 19 parcela.

Forcat blu të Shkodrës njoftojnë se parcelat janë evidentuar në fshatrat Benë, Sumë, Cukal, “Bjeshkët” e Prekalit, “Lohe e Sipërme” në Shkrel, në Malësinë e Madhe si dhe në fshatrat Sapaq e Iballë të Pukës. Ende nuk ka asnjë autor të dyshuar për kultivimin e kësaj sasie hashashi, por policia po punon për identifikimin e tyre dhe më pas kapjen.

Vlorë, asgjësohen 2284 rrënjë kanabis; një i arrestuar, një i shpallur në kërkim

Operacione antikanabis janë zhvilluar edhe në Vlorë, ku janë asgjësuar në total 2284 rrënjë bimë narkotike e zbuluar në disa fshatra, si dhe është arrestuar në flagrancë shtetasi Vladimir Ganaj, 57 vjeç, ndërsa është shpallur në kërkim i biri Marildo Ganaj, 20 vjeç.

Sipas komunikatës së Policisë së Vlorës lënda narkotike e llojit hashash është zbuluar në fshatrat Tërbaç, 925 rrënjë, si dhe Vezhdanisht, Treblovë dhe Kropisht me 1359 rrënjë.

Sasia e gjetur në Tërbaç ishte mbjellë në pronën e shtetasve të mësipërm, në vendin e quajtur “Hundat Gjoke”, ndërsa lënda e gjetur në 3 fshatrat e tjerë, e cila kishte arritur lartësinë 100-200 cm, ka mbetur ende pa autorë, për identifikimin dhe kapjen e të cilëve po punon policia.

Mallakastër, asgjësohen 1532 rrënjë kanabis

Aksionet antikanabis janë shtrirë edhe në Mallakastër, ku janë asgjësuar 1532 rrënjë kanabis në fshatin Rriban, në vendin e quajtur “Mulliri i Shkëmbit”, të mbjella në 3 parcela në një pyll me pisha.

Specialistë të krimeve në Komisariatin e Mallakastrës kanë nisur procedimin penal dhe po punojnë për identifikimin dhe kapjen e autorit apo autorëve, ndërkohë që materialet hetimore për veprën e “kultivimit të bimëve narkotike” i kanë kaluar edhe Prokurorisë pranë Gjykatës së Shkallës së Parë Fier.

Top Channel