Kosovë, arrestohen disa aktivistë të Vetëvendosjes
11/09/2015 11:45
Ambasadori i Gjermanisë në Prishtinë: Kosovën e pret punë e vështirë për t’u anëtarësuar në Këshillin e Evropës në maj 16/04 23:01
Me 12 të shoqëruar nga Policia e Kosovës ka përfunduar të premten aksioni i Lëvizjes Vetëvendosje, aktivistët e së cilës shfrynë gomat e makinave zyrtare dhe vendosën fletushka me mbishkrimin “Jofunksional”.
Numrin e të shoqëruarve nga policia e konfirmoi për Top Channel zyrtarja për informim në Policinë e Kosovës, Florie Ahmeti.
Aksioni u zhvillua në oborrin e ndërtesës së re të qeverisë, ku kanë zyrat disa ministri. Aktivistët e Vetëvendosjes u penguan nga forca policore, të cilëve më pas u erdhi në ndihmë edhe njësia speciale.
Sipas lëvizjes Vetëvendosje, aktivistët kanë bërë jo funksionale mbi 40 makina zyrtare, pasi sipas tyre shteti i Kosovës do të bëhet jo funksional nëse fillon zbatimi i marrëveshjes për “Zajdenicën”, siç e quan lëvizja Vetëvendosje Asociacionin e Komunave Serbe.
“Ne sot duam të defunksionalizojmë qarkullimin e veturave të qeverisë së Isa Mustafës sepse këtë qeveri Mustafa po e përdor për ta jetësuar “Zajednicën”, me gjithë dëmet e rreziqet e saj për shtetin e Kosovës. Mustafa ka vënë gjithë sistemin shtetëror në funksion të “Zajednicës”. Edhe policia edhe gjyqësia janë bërë jashtëzakonisht efektive kur vjen puna t’i arrestojnë dhe dënojnë kundërshtarët e këtij projekti”, thuhet ndër të tjera në komunikatën e Vetëvendosjes lidhur me këtë aksion.
Vetëvendosje po ashtu ka njoftuar edhe për disa aktivistë të lënduar.
Pas përfundimit të aksionit, aktivistët janë përcjellë nga efektivë dhe njësia speciale e Policisë së Kosovës përgjatë sheshit “Nëna Terezë”, deri në afërsi të zyrës së tyre.
Top Channel
