Greqi, tërheqje masive parash edhe pas vendosjes së kontrollit

Arsyeja e këtyre veprimeve të heshtura, sipas ekspertëve vendas të ekonomisë, është se bankat ende nuk e kanë rifituar besimin e qytetarëve. Shumë grekë druhen se mund t’i humbasin kursimet e tyre në përpjekjet e autoriteteve për të shpëtuar bankat, veçanërisht pasi rikapitalizimi i njoftuar për bankat mund të vazhdojë deri nga vjeshta.

Në Greqi – kujtojnë mediat gjermane, – ashtu si në të gjitha vendet e tjera të BE-së, vlen gjithashtu sigurimi ligjor i depozitave bankare, deri në një maksimum prej 100 mijë eurosh. Kjo nuk është, sidoqoftë, një garanci europiane, por kombëtare.

Edhe pse për momentin, depozitave mbi këtë shumë nuk u kanoset ndonjë rrezik, frika ekziston dhe mbase nuk do të zhduket para procesit të rikapitalizimit. Ekonomistët shohin edhe një problem tjetër, kur flitet për rivendosjen e besimit tek institucionet financiare greke.

Një numër jo i vogël grekësh janë larguar për shkak të krizës, e t tjerë, të nisur nga zhvillimet e së  shkuarës, nisen tani, shpeshherë nga pikëpamja e gabuar se mund të jetojnë edhe pa bankat.

Nga ana tjetër, frika që ngjall pasiguria e situatës nuk i ka frenuar grekët të shpenzojnë. Konsumi privat në vend ka pësuar rritje në gjysmën e parë të vitit, sipas shifrave zyrtare, ndonëse vazhdimi i kësaj prirjeje për pjesën tjetër të vitit pritet për t’u parë.

Top Channel