Kosovë, ndotje alarmante në Obiliq; Veseli: Ligji i ri shpëton komunën

Janë 30 raste të reja të diagnostifikuara me kancer vetëm këtë vit, pa përfshirë sëmundjet e tjera të frymëmarrjes, bëri të ditur kryetari i komunës gjatë vizitës së kryetarit të Kuvendit, Kadri Veseli.

Vizita e Veselit ndodh një ditë para se Kuvendi të votojë për projektligjin për zonën e rrezikuar të Obiliqit, që duket se ka ngjallur sado pak shpresat e autoriteteve komunale dhe banorëve për një zgjidhje të problemit të ndotjes mjedisore.

“Duke ardhur këtu, edhe ju sigurisht e keni parë tymin e Obiliqit nga “Kosova A”, një tym i zi që vjen për ngrohjen e shtëpive tona. Besoj dhe jam i bindur se gjithë Kosova i detyrohet komunës së Obiliqit dhe qytetarëve të saj, që t’ua shpërblejë këtë sakrificë për prodhimin e energjisë elektrike për tërë qytetarët e Kosovës. Nesër besoj se tërë deputetët do ta votojnë projektligjin për këtë zonë me një votë unanime, në mënyrë që të krijohet një përkrahje e veçantë e që të parandalohet ndotja e ambjentit”, deklaroi Veseli për mediat.

“Obiliqi në këto rrethana në të cilat ndodhet konsiderohet krenaria e Kosovës, por në të vërtetë qytetarët po e përjetojnë shumë rëndë këtë situatë. Kemi probleme të shumta, pasi kur shpërndahet energji elektrike për tërë Kosovën, reduktimet më të mëdha janë në komunën tonë. Në komunën e Obiliqit kemi 30 raste të reja të sëmundjeve me kancer, pa llogaritur këtu sëmundjet e tjera të frumëmarrjes. Ndaj ne shpresojmë që ky ligj do t’i zgjidhë këto probleme”, deklaroi Xhafer Gashi, kryetar i Komunës së Obiliqit.

Qëllimi i projektlligjit për zonën e rrezikuar mjedisore është përcaktimi i komunës së Obiliqit si zonë me rrezik të veçantë mjedisor, si pasojë e ndotjes së vazhdueshme të ajrit, tokës dhe ujit nga prodhimi i energjisë nga thëngjilli dhe mospërdorimit të filtrave të duhur.

Përveç politikave për menaxhimin e kësaj zone, projektligji parasheh zhvendosjen e popullatës nga zonat të cilat nuk i plotësojnë kushtet e jetesës sipas standardeve europiane, trajtimin e nevojave shëndetësore që vijnë si pasojë e mjedisit të ndotur, të drejtën e komunës për qasje në projekte dhe një grant të veçantë, i ndarë nga qeveria e Kosovës.

Top Channel