PD: Qeveria po heq sigurinë e barnave për interesat e klientelës

05/10/2015 13:45

Partia Demokratike, përmes deputetit Tritan Shehu ka deklaruar këtë të hënë se, projektligji i ardhur nga qeveria për ndryshimin në ligjin për “barnat dhe shërbimin farmaceutik” cënon rëndë sigurinë medikamentoze.

“Ky ndryshim kërkon heqjen nga ai ligj, në nenin për importin e medikameteve te prodhuara në vendet e Ballkanit, të detyrimit “që ato të qarkullojne në një nga vendet e BE”. Ky “liberalizim” godet frymën e ligjit, eliminon kriteret e cilësisë se medikamenteve të qarkulluara tek ne, mbi të cilat bazohet ai”, ka deklaruar Shehu.

Sipas tij, argumentimi i Ministrisë së Ekonomisë me marrëveshjen e CEFTA-s është i gabuar, pasi ajo ka të bëjë me tregtinë e lirë, që nuk preket.

Standardet dhe koefiçenti i sigurisë, ka vijuar deputeti i opozitës, janë diçka tjetër për të cilën përgjigjet së pari Ministria e Shëndetësisë para popullësisë.

“Ky ndryshim në ligj, nëse realizohet duhet paraprirë detyrimisht me të tjerë elementë që sigurojnë cilësinë e atyre medikamenteve edhe tek ne, njëlloj si në vendet e BE-së. Në këto kushte, ne kërkojme që më parë të ngrihet një komision i posaçëm i përbërë nga specialistë vendas dhe të huaj, të zyrtarizuar nga EMA ose OBSH, për të përmirësuar: ligjin tonë në drejtim të sigurisë së medikamenteve të prodhuara në vend, të importuara nga vendet e Ballkanit, si dhe për të forcuar kapacitetet tona kontrolluese e laboratorike”, ka thënë Shehu.

Ai ka shtuar se, për prodhimin vendas duhen përcaktuar mekanizmat e plota të sigurisë.

“Në kushtet aktuale, kur tregu farmaceutik në vendin tonë është në konfuzion, kur mungojnë kapacitetet e plota kontrolluese të medikamenteve, nuk duhet realizuar një ndryshim ligjor i tillë pa u implementuar me parë mekanizmat e kontrollit. Siguria medikamentoze nuk mund të preket as për premtime politike ndaj vendeve të tjera, as për ulje artificiale të kostos dhe as për interesa grupimesh të ndryshme”, ka shtuar Shehu.

Top Channel