Maqedoni, PDSH: Shërbimi sekret, e keqja më e madhe e shqiptarëve

Siç u shpreh udhëheqësi i PDSH-së, Menduh Thaçi, ai është ndjekur ndër vite nga shërbimet sekrete maqedonase, vetëm pse është angazhuar për avancimin e të drejtave të shqiptarëve.

“Shërbimi sekret maqedonas është i brumosur nga brenda me antishqiptarizëm. Në mendjen kolektive të shqiptarëve, ashtu si edhe MPB-ja, këto dy institucione perceptohen si burimi i së keqes dhe raprezaljeve që përjetojnë shqiptarët”, tha Ernad Fejzullahu, deputet i PDSH-së.

Gjatë debatit lidhur me raportin e ekspertëve europianë mbi sundimin e së drejtës në vend dhe rekomandimeve, që ata propozojnë për hetimin e materialeve të përgjuara, deputetët e opozitës maqedonase akuzuan kryeministrin Gruevski se, ka rrënuar sistemin kushtetues duke shpërdoruar pushtetin.

“Qeveria dhe VMRO-DPMNE-ja kanë shkelur parimet bazë të Kushtetutës, duke përgjuar politikanët e qeverisë dhe pushtetit, por edhe gazetarët dhe aktivistët e shoqërisë civile”, tha Goran Misovski, deputet i PRSD-së.

Me vlerësime krejtësisht të ndryshme dolën deputetët e partisë maqedonase në pushtet, VMRO-DPMNE, të cilët shprehën rezerva për raportin e përgatitur nga ekspertët e Komisionit Europian.

“Jam i detyruar të shpreh rezervat që kam, ndaj të gjitha vërejtjeve, sepse nuk është e mundur që në një afat prej 7 ditësh të bëhet një analizë për situatën në vend. Bëhet fjalë për raport subjektiv”, tha Pavle Sazdov, deputet i VMRO-DPMNE-së.

Deputetët e opozitës theksuan nevojën për reforma të thella në Drejtorinë për Sigurinë dhe Kundërzbulimin. Ata kërkuan që kontrolli parlamentar mbi shërbimet inteligjente në vend të mos mbetej vetëm në letër.

Top Channel