Sulmi në Kunduz, “Mjekët pa kufij” kërkojnë hetim të pavarur nga SHBA-të

Siç pohon dhe vetë, agjencia e ndihmës nuk ia ka besën verifikimeve të brendshme të ushtrisë amerikane, ndaj këmbëngul që çështja të zbardhet nga Komisioni humanitar ndërkombëtar Faktzbulues, i krijuar në 1991-shin, në bazë të Konventës së Gjenevës, por deri më sot jofunksional.

IHFFC-ja nuk është një gjykatë, ai thjesht mbledh fakte e paraqet rekomandime. Edhe pse u themelua përpara dy dekadash e gjysmë, me qëllimin të hetonte mbi shkeljet e rënda të ligjeve humanitare ndërkombëtare, ai nuk është vënë asnjëherë në përdorim.

Shtetet e Bashkuara dhe Afganistani, të akuzuara për incidentin e Kunduzit, nuk janë në mesin e 76 vendeve firmëtare në krijimin e këtij organizmi. Që IHFFC-ja të nisë hetimin me të, duhet të jenë dakord të gjitha palët e përfshira.

Uashingtoni këmbëngul se spitali është goditur gabimisht, në vazhdën e përpjekjeve për të zmbrapsur talebanët, që kishin marrë nën kontroll një pjesë të madhe të qytetit të rëndësishëm verior.

Por agjencia ndërkombëtare ndan një këndvështrim krejt tjetër. Sipas saj, koordinatat e spitalit njihen mirë nga të gjithë dhe nuk ka gjasa, që bombardimi të ketë qenë një gabim. Organizata fituese e Nobelit të Paqes në 1999-n sqaron se, procedurat po i nis nga supozimi se sulmi përbën krim lufte.

Edhe pse është urdhëruar nisja e disa hetimeve paralele nga Departamenti amerikan i Drejtësisë, Pentagoni, NATO-ja dhe një ekip amerikano-afgan, drejtuesja e saj, Joanne Liu u tha reporterëve në Gjenevë se “Mjekët pa kufij” nuk mbështeten dot te kontrolle të brëndshme, ndaj zgjidhja më e mirë – sipas saj, – është që grupi t’i drejtohet IHFFC-së, si organizmi i vetëm i përhershëm që verifikon shkeljet e ligjit humanitar ndërkombëtar, e që mund të tregojë se cila është e vërteta.

Top Channel