Ja formacioni anti-Serbi, rikthehet Balaj në sulm

08/10/2015 00:00

Në prag të sfidës së shumëpritur të “Elbasan Arena”-s mes Shqipërisë dhe Serbisë, që do të zhvillohet mbrëmjen e kësaj të enjteje, e vlefshme për kualifikueset e Europianit 2016, Top Channel mëson edhe formacionin me të cilin pritet të zbresin kuqezinjtë në fushën e blertë.

Trajneri italian i kombëtares shqiptare, Gianni de Biasi, duket se ka vendosur të hedhë në fushë një ekip të kujdesshëm në mbrojtje, por me krahët të afta për të shfrytëzuar çdo mundësi të ofruar për të “ushqyer” me topa sulmuesin e vetëm në kërkim të golit.

Në portë do të jetë Etrit Berisha, ndërkohë që prapavijën do ta plotësojnë me radhë, nga e djathta në të majtë, Elseid Hysaj, Berat Gjimshiti, kapiteni Lorik Cana dhe Ansi Agolli.

Në mesfushën e ngjeshur të kuqezinjve do të jenë, me përjashtim të ndonjë surprize të minutave të fundit, Andi Lila, Taulant Xhaka, Migjen Basha, Amir Abrashi dhe Ermir Lenjani. Si gjithmonë, Lila dhe Lenjani do të jenë ata që do të ndihmojnë ekipin në fazën sulmuese.

Në sulm do të jetë i vetëm Bekim Balaj, sulmuesi shkodran që shënoi në Portugali në sfidën e parë të këtyre kualifikueseve, duke hedhur bazat e para të kësaj ecurie të jashtëzakonshme të kuqezinjve në këtë edicion.

Formacioni anti-Serbi:

Portier: Berisha
Mbrojtës: Hysaj, Gjimshiti, Cana, Agolli
Mesfushorë: Lila, Xhaka, Basha, Abrashi, Lenjani
Sulmues: Balaj

Top Channel