Superliga, Partizani ngjitet në krye; Tirana-Flamurtari ndahen në paqe

Në Ballsh, Partizani vuajti shumë por në fund arriti të dalë me 3 pikë falë shkodranit, i cili është shndërruar tashmë në protagonistin kryesor të të kuqve.

Edhe pse kaluan të parët në avantazh me Peposhin, ballshiotët nuk arritën të administronin rezultatin. Gëzimi i tyre zgjati vetëm 3 minuta, pasi Batha barazoi për të kuqtë.

Pas këtij momenti të dyja skuadrat krijuan raste para portës kundërshtare, por asnjëra prej tyre nuk arriti t’i finalizojë ato me gol. Atëherë kur mendohej se gjithçka do të mbyllej në barazim, Sukaj, i gjendur në vendin dhe në kohën e duhur, shënoi golin e fitores për Partizanin.

Përveç 3-pikëshit të kryeqytetasve, lajmi i fundjavës në futbollin shqiptar ishte padyshim fitorja e Vllaznisë, e para kjo për shkodranët në këto 7 javë kampionat.

Kuqeblutë mundën 0-3 në transfertë Tërbunin, sukses ky që bën të harrohen për disa momente tensionet në klubin shkodran. Shtubina, Soza dhe në fund Paviçeviç ishin autorët e golave të triumfit të Vllaznisë, e cila ngjitet në vendin e tetë duke lënë menjëherë pas vetes Tërbunin dhe Bllashin.

Fitoi në minutat e fundit edhe Kukësi i Troisit, i cili mundi 1-0 Laçin me 10 lojtarë. Nënkampionët e Shqipërisë vuajtën shumë përballë një skuadre e cila përveç lojës së mirë diti të mbrohej po aq mirë.

Kuksianët shpërdoruan edhe një 11-metërsh, ndërkohë që golin e fitores për ta e shënoi Malota, 2 minuta nga fundi i ndeshjes.

Sfida e vetme e së shtunës e cila përfundoi në barazim ishte ajo mes Tiranës dhe Flamurtarit, dy skuadra këto që gjenden në mesin e renditjes.

Golit të Vuçajt për Tiranën në fillimin e ndeshjes, vlonjatët iu kundërpërgjigjën me Tshakadzen në pjesën e dytë.

Top Channel