Zbulohen 23 kandidatët për Topin e Artë

20/10/2015 09:45

FIFA dhe “France Football“ publikuan listën e 23 futbollistëve dhe 10 trajnerëve që do të pretendojnë fitoren e Topit të Artë në kategoritë respektive, në ceremoninë që do të zhvillohet në 11 janar të vitit 2016.

Barcelona, skuadra kampione e Evropës, përfaqësohet në këtë listë nga 6 futbollistë, ku përveç treshes sulmuese Messi-Neymar-Suarez, janë të përfshirë edhe Iniesta, Rakitic e Mascherano. Ndërsa Reali i Madridit ka 5 kandidatë në këtë listë: Ronaldo, Benzema, Bale, Kroos dhe James Rodriguez.

Për t’u theksuar është se mes 23 futbollistëve kandidatë të Topit të Artë, nuk ka shumë përfaqësues të Juventusit, kampione e Italisë dhe finaliste e Ligës së Kampioneve sezonin e kaluar. Për bardhezinjtë spikat Paul Pogba, ndërkohë që bie në sy edhe emri i Arturo Vidal, i cili gjatë muajve të verës u transferua te Bayern Munchen.

Edhe klubi gjerman ka futbollistët e tij mes kandidatëve për këtë trofe: Lewandowski, Muller, Neuer dhe Robben. Pak javë më vonë do të mësohen edhe emrat e 3 finalistëve që do të përcaktohen nga trajnerët dhe kapitenët e skuadrave kombëtare.

Ndërkaq, përsa u përket trajnerëve, mes 10 pretendentëve shfaqen emrat e Luis Enrique dhe Massimiliano Allegri, Ndërkohë që në garë janë edhe trajnerë si Unai Emeri, Pep Guardiola, Laurent Blanc, Carlo Ancelotti apo Jose Mourinho.

Lojtarët kandidatë për Topin e Artë:

Sergio Agüero (Manchester City), Gareth Bale (Real Madrid), Karim Benzema (Real Madrid), Cristiano Ronaldo (Real Madrid), Kevin De Bruyne (Manchester City), Eden Hazard (Chelsea), Zlatan Ibrahimovic (Paris Saint-Germain), Andres Iniesta (FC Barcelona), Toni Kroos (Real Madrid), Robert Lewandowski (Bayern Munchen), Javier Mascherano (FC Barcelona), Lionel Messi (FC Barcelona), Thomas Müller (Bayern Munchen), Manuel Neuer (Bayern Munchen), Neymar (FC Barcelona), Paul Pogba (Juventus), Ivan Rakitic (FC Barcelona), Arjen Robben (Bayern Múnchen), James Rodriguez (Real Madrid), Alexis Sanchez (Arsenal), Luis Suarez (FC Barcelona), Yaya Touré (Manchester City) dhe Arturo Vidal (Bayern Munchen).

Trajnerët kandidatë për Topin e Artë:

Massimiliano Allegri (Juventus), Carlo Ancelotti (Real Madrid), Laurent Blanc (Paris Saint-Germain), Unai Emery (Sevilla), Pep Guardiola (Bayern Munchen), Luis Enrique (FC Barcelona), Jose Mourinho (Chelsea), Jorge Sampaoli (Kili), Diego Simeone (Atletico Madrid) dhe Arsene Wenger (Arsenal)

Top Channel