Kosovë, opozita: Nuk tërhiqemi nga kërkesa për tërheqjen e nënshkrimeve

Ata përsëritën se nuk do të ndalen deri në tërheqjen e nënshkrimeve nga këto dy marrëveshje, ose deri në dorëheqjen e kryeministrit Isa Mustafa.

Kryetari i Lëvizjes Vetëvendosje, Visar Ymeri tha se, përmes pankartave i dërguan dy porosi komisionerit të BE-së, duke i bërë me dije se, opozita e Kosovës nuk do të ndalet deri në anulimin e këtyre dy marrëveshjeve.

Shefja e grupit parlamentar të AAK-së, Donika Kadaj-Bujupi tha se, protestat kundërshtuese ndaj shkeljes së Kushtetutës do të vazhdojnë. Ndërsa sipas kryetarit të “Nismës për Kosovën”, Fatmir Limaj, Kosova nuk e ka merituar të qëndrojë e izoluar, teksa po shpërblehen ata që kanë kryer genocid.

Veprimet e opozitës, shefi i grupit parlamentar të PDK-së, Adem Grabovci i komentoi si të frymëzuara nga orientimet lindore. Ai tha se Kosova është e orientuar nga Perëndimi, me qëndrime proamerikane, ndërsa të gjitha të këqijat popullit kosovar i kanë ardhur gjithnjë nga Lindja.

Kuvendi i Kosovës ka mbajtur dy seanca solemne, në të cilat deputetëve kosovarë u janë drejtuar Presidenti austriak dhe komisioneri Johannes Hahn, ndërkohë që është zhvilluar edhe seanca, ku u miratua projektligji për ratifikimin e MSA-së, në të cilën opozita mungoi pas largimit në salla.

Top Channel