Avokati i Popullit: Për pronat, kompensim financiar

Ndihmës komisioneri pranë këtij institucioni, Albert Gjoleka deklaron se drafti i hartuar nuk është bërë në konsultim me grupet e interesit.

“Këto grupe interesi kanë kërkuar përfshirjen në grupet e hartimit të këtij pr/ligji, por nuk kanë gjetur miratimin e këtij organi”, nënvizon Gjoleka.

Sipas tij, një tjetër pikë problematike është se drafti nuk përfshin termin “kthim fizik” të pronës.

“Ajo që është konstatuar në qëndrimet e mbajtura prej tyre ka të bëjë me mosparashikimin e kthimit fizik të pronave të paluajtshme dhe vlerësimit të pasurive me çmimet që kanë të bëjnë me shtetëzimin e tyre, që daton në vitin 1976”, thotë Gjoleka.

Ai shton se çështja e çmimit mund të shtojë edhe paditë në gjykata.

“Jo më larg se këtë javë ne jemi në dijeni që Gjykata e Strazburgut ka dhënë një vendim në favor të 12 individëve që kanë paditur shtetin shqiptar dhe fatura që duhet të paguajë buxheti i shtetit është 5.3 mln euro. Ndërkohë që ka edhe qytetarë të tjerë që kanë bërë padi të ngjashme”, shton Gjoleka.

Top Channel