Tahiri: Lufta ndaj drogës, progres raporti vlerësoi policinë

“Në luftën kundër drogës Raporti thotë se Shqipëria ka arritur në një nivel të kënaqshëm për sa i përket luftës kundër krimit të organizuar dhe ndërkohë ka kryer një sërë operacionesh me qëllim zbatimin e ligjit të cilat kanë çuar në shkatërrimin e plantacioneve të mëdha të kanabisit. Progres raporti konstaton dhe shqetësime të përsëritur nga qeveria shqiptare dhe gjithashtu përsëritur nga MPB dhe Policia e Shtetit lidhur me ndjekjen penale që pason veprimin e policisë. Ndaj Progres-raporti konstaton se hetimi dhe ndjekja penale e të arrestuarve gjatë këtij operacioni nuk ka qenë vendimtar. Ky është padyshim një konfirmim tjetër i prioritetit maksimal të shoqërisë, të shtetit, të qeverisë shqiptare dhe mbi të gjitha të parlamentit për të çuar përpara në një kohë sa më të shpejtë, përfundimin e procesit të konsultimit, të hartimit përfundimtar dhe të miratimit të reformës në drejtësi për të bërë të mundur që puna e policisë të mos shkojë dëm”, tha Tahiri.

Ai ftoi opozitën dhe skeptikët të mos e sulmojnë policinë në luftën e saj ndaj krimit.

“Ne sigurisht nuk presim që skeptikët apo opozita të kërkojë ndjesë, por me plot arsye kërkojmë që opozita dhe cilido të mbështesë Policinë e Shtetit në përkjen tonë të përbashkët për ta bërë Shqipërinë më të sigurtë”, u shpreh ministri.

Sipas ministrit të Brendshëm bashkëpunimi rajonal mbetet një ndër pikat më të vlerësuara të progres raportit.

“Duke vlerësuar për herë të parë pozitivisht punën që ka bërë Policia e Shtetit me partnerët duke shkëmbyer informacion, duke fituar besimin dhe duke ndërtuar rezultate pozitive mbi këtë punë.”, tha ministri i Brendshëm.

Top Channel