Kavaja pa gjyqtarë. Nuk formohet as trupi gjykues

27/12/2015 13:35

Zvarritja e proceseve gjyqësore është kthyer në një problem në kufijtë e skandalit për qytetarët e Kavajës. Ndërsa rëndom në gjykata zvarritja e proceseve vjen prej mungesës në seancë të avokatëve, prokurorëve dhe vetë administratës së gjyqësorit për njoftimet jo në kohë të palëve, në Kavajë këtyre shkaqeve u shtohet edhe mungesa e gjyqtarëve.

Gjykata e Rrethit Gjyqësor Kavajë funksionon me vetëm një gjyqtar dhe një kryetare gjykate. Kjo situatë është kthyer në problem dhe për vetë komunitetin e avokatëve.

Avokati Kristaq Andoni thotë: “Janë mbi 100 mijë banorë që mbulohen nga kjo gjykatë, përfshirë dhe dy institucione të vuajtjes së dënimit dhe riedukimit, përkatësisht burgu i Rrogozhinës dhe ai i të miturve të Kavajës”.

Nga 7 gjyqtarë që kishte deri para disa vitesh, sot kjo gjykatë ka në organikë 4 gjyqtarë, por vetëm zyrtarisht, pasi “de facto” në gjykatë është vetëm kryetarja dhe një gjyqtar. Në këtë situatë, kur kostot e shumta rëndojnë mbi qytetarët, edhe për avokatët e Kavajës qëndrimi i Këshillit të Lartë të Drejtësisë është i pakuptueshëm, ndaj ata apelojnë qe KLD dhe presidenti Nishani të ndërhyjnë me urgjencë për zgjidhjen e situatës.

“Nuk fajësoj as gjykatën e as gjyqtarët, por i bëj thirrje KLD-së dhe Presidentit të Republikës që ta shikojnë me urgjencë këtë çështje. Të shtohet personeli i gjykatës”, shton Andoni.

Gjendja në Gjykatën e Kavajës është e paprecedentë, pasi nuk arrihet të formohet as treshja e gjyqtarëve për gjykimet me trup gjykues. Për të mbuluar këtë nevojë në Kavajë janë komanduar gjyqtarë të Durrësit, të cilët nga ana e tyre ankohen për mbingarkesë pune.

Top Channel