Gjendet i vrarë lidhur këmbë e duar një 40-vjeçar

07/01/2016 09:00

40-vjeçari Gazment Çollaku, i marrë peng një ditë më parë në qytetin e Durrësit, është gjetur i vdekur dhe i lidhur me këmbë e duar në afërsi të fshatit Murqin të Krujës.

Trupi i pajetë i Çollakut u gjet ditën e enjte në anë të rrugës. Ai u mor peng një ditë më parë nga persona të veshur me uniforma policie.

Viktima është qëlluar me armë në kokë dhe mendohet se ekzekutimi i tij ka lidhje me vrasjen e dy të rinjve, Ervin Kodra dhe Endri Caushaj, ngjarje e ndodhur në muajin dhjetor pranë hyrjes së Portit të Durrësit.

40-vjeçari u mor peng në lagjen numër 1 të qytetit të Durrësit mbrëmjen e kaluar nga persona ende të paidentifikuar. Dëshmitarët në vendngjarje menduan se bëhej fjalë për një shoqërim të tij në polici pasi pengmarrësit kanë qenë me uniforma policie.

Çollaku rezulton një person me precedentë penalë. Në 2 mars të 2008-ës, pas një sherri banal mes të rinjsh në disko “Riviera” në lagjen numër 1 të Durrësit, Gazment Çollaku plagosi rënë me armë zjarri shtetasin Kreshnik Balla. Ai u kap pas disa muajsh arratie në një apartament në plazhin e Golemit.

Për këtë vepër penale si dhe për mbajtje pa leje të armëve dhe municioneve, Gjykata e Durrësit e dënoi në shkurt të vitit 2009 me 2 vite e 4 muaj burgim. Vetëm një vit më pas, në mars të 2010, Çollaku në gjendje lirie arrestohet dhe dënohet me 4 muaj burg për armëmbajtje pa leje.

Në rastin e plagosjes, prokuroria e akuzoi edhe për falsifikim dokumentash pasi në banesë iu gjetën karta identiteti dhe patenta italiane false, por gjykata nuk i vlerësoi si provë për ta dënuar për shkak se nuk provohej përdorimi i tyre.

Policia po punon për zbardhjen e krimit të rëndë dhe po kryen hetime mbi të shkuarën kriminale të Çollakut. Pista kryesore e krimit mbetet ajo e larjes së hesapeve.

Top Channel