Ekzekutimi masiv i ISIS; xhihadistët vrasin mbi 280 fëmijë, gra e të moshuar

17/01/2016 00:00

Një ekzekutim masiv i radhës nga ISIS, ka tronditur opinionin publik teksa terroristët kanë vrarë rreth 280 persona në një provincë në Sirine Lindore. Disa nga banorët e mbetur të zonës thonë se familje të tëra janë shfarosur.

Për militantët arsyeja që i shtyu ata të ndërmarrin këto akte barbare kundër civilëve, ishte bashkëpunimi me trupat siriane. Mes të vrarëve shumica janë të moshuar, gra dhe fëmijë. Ekzekutimet vijnë vetëm një ditë pasi Rusia kishte shpërndarë ndihma humanitare për njerëzit atje të cilët jetonin mes kushteve ekstreme të varfërisë.

Ndërkohë që raporte nga Sira bëjnë me dije se pjesëtarët e grupit ekstremist, kanë rrëmbyer së paku 400 vetë të cilët po mbahen peng. Observatori sirian për të drejtat e njeriut, që e monitoron situatën në Siri, tha se militantët i kanë dërguar pengjet në pjesën veriore të qytetit.

Ndërkombëtarët i druhen dhe një tjetër ekzekutimi masiv, i cili do te ishte fatal për dramat që përjeton populli sirian.

Shteti Islamik ka kontrollin në pjesën më të madhe të provincës lindore Deir al-Zor, ndërsa qeveria kontrollon disa pjesë të qytetit me po këtë emër, përfshirë këtu edhe aeroportin ushtarak. Kjo zonë ka rëndësi për grupin militant pasi i mundëson këtij të fundit lidhjen me territoret që ka nën kontroll në Irak.

Top Channel