Llalla në Shkodër: Forcim të bashkëpunimit me policinë

“Të gjitha prokuroritë kanë të përbashkët numrin e lartë të procedimeve të pezulluara ose të mosfilluara. Është e qartë që rastet e pezullimit dhe mosfillimit, kanë të bëjnë me mungesën e zbulimit të autorëve nga agjencitë ligjzbatuese ose nga cilësia e referimeve të veprave penale. Por po e përsëris porosinë që kam përcjellë edhe në analizat e tjera. Na takon ne si prokurorë për të realizuar koordinimin ndërmjet institucioneve ligjzbatuese, me qëllim që informacioni i tyre të përpunohet në mënyrë të tillë që të shërbejë për ngritje akuzash”, është shprehur Llalla.

Ai ka vlerësuar punën e Prokurorisë së Shkodrës në zbardhjen sa më të shpejtë të rastit të vrasjes së turistëve çekë, i cili shkaktoi një reagim të fortë në shoqërinë shqiptare.

“Analizën vjetore këtu dëshiroj ta nis me vlerësimin për zgjidhjen e shpejtë ligjore të Prokurorisë së Shkodrës për një rast tragjik që ndodhi në vitin 2015, pikërisht vrasjen e dy turistëve çekë në zonën e Dukagjinit. Hetimet e shpejta dhe vendosja para përgjegjësisë ligjore të autorit të asaj vepre penale që shkaktoi me të drejtë revoltë qytetare, ishte një detyrim i të gjithë shtetit, si edhe një formë ndjese për atë krim që cënonte mikpritjen dhe humanizmin shkodran, por edhe të shqiptarëve në përgjithësi”, tha Llalla.

Kryeprokurori Llalla i la si porosi prokurorisë së Lezhës, të jetë më aktive në rastet e falsifikimit të pronave, si dhe në veprat penale të dëmtimit të pyjeve, Organi i akuzës ka nënshkruar marrrëveshje me institucionet parkatëse për këto dy çështje.

Top Channel