Protesta, traktorët “pushtojnë” Selanikun. Sofja kritikon Athinën për doganat

Sipas përfaqësuesve të tyre, ata i kanë dërguar edhe një peticion konsullatës gjermane në këtë qytet.

Kjo është forma e re që kanë gjetur fermerët e 4 pikave nevralgjike përreth qytetit verior, në ditën e 22-të të protestës së tyre, me anë të së cilës kundërshtojnë reformën e re të pensioneve dhe të sistemit të taksave, e cila – siç shprehen, – gjunjëzon të gjithë të punësuarit në sektorin e bujqësisë.

Ndërkohë, nga bllokimi prej 5 ditësh i Doganës së Promahonës në kufirin greko-bullgar, radha e kamionëve shkon në 25 km në të dy anët e kufirit, ndërsa Ministria e Jashtme e Bullgarisë ka dërguar një notë proteste për bllokimin e 4 pikave doganore me Greqinë, duke kritikuar Athinën zyrtare se “nuk ka përmbushur detyrimet e saj për respektimin e lirive themelore në BE, siç është lëvizja e lirë e njerëzve dhe mallrave ndërmjet shteteve anëtare”.

Gjatë së premtes, për shumë orë është mbyllur autostrada kryesore që lidh Athinën me Selanikun në vendin e luginës së Tebit, ndërsa i bllokuar nga 800 traktorë vazhdon të jetë edhe kryqëzimi i Malgares, 22 km në Perëndim të Selanikut, një nyje nevralgjike nga e cila kalojnë gjithë automjetet me destinancion Shqipërinë dhe Greqinë kontinentale, drejt Jugut e ishujve dhe anasjelltas.

Përshkallëzimi i protestët së fermerëve kulmon mesditën e së shtunës. Sipas ultimatumit, që përfaqësuesit e tyre i kanë dërguar kryeministrit grek, Alexis Tsipras, do të bllokohen për 24 orë në fundjavë të 62 pikat, ku ata kanë nxjerrë mbi 10 mijë traktorët e tyre, nëse qeveria nuk merr mbrapsh projektligjin e reformave në fjalë.

Midis pikave që do të bllokohen përfshihen edhe Dogana e Kapshticës, hyrjet në aeroportet e Athinës dhe Selanikut, si dhe hyrjet në të gjitha portet e vendit, përfshi edhe aeroportet e portet e ishujve grekë.

Top Channel