Gara paraprake për Presidencialet në SHBA, votohet në New Hampshire

Në bazë të ligjit të shtetit të New Hampshire, qytetet me popullsi nën 100 banorë mund të aplikojnë për të hedhur votën, sapo akrepat e orës shënojnë mesnatën. Me votat e tyre, në kampin demokrat kryeson senatori i Vermontit, Bernie Sanders, ndërsa në atë republikan John Kasich. Mes votuesve, 4 demokratë zgjodhën zotin Sanders, ndërsa mes republikanëve, dy zgjodhën Donald Trump dhe 3 guvernatorin e Ohios, John Kasich.

Për analistët, gara në kampin republikan është e fraksionuar. Donald Trump po shpreson për një performancë më të mirë se në Iowa, javë e kaluar, ku u mposht nga senatori Ted Cruz.

Në debatin e fundit të fushatës për New Hampshire, e cila konsiderohet si një ditë e rëndësishme për të tërhequr votuesit “gri”, ose të pavendosur, Trump lëshoi një breshëri fyerjesh ndaj rivalëve të tij republikanë, e kryesisht sulmoi senatorin Ted Cruz. Favoriti republikan për New Hampshire, me vulgaritet ofendoi edhe Jeb Bush e Marco Rubion.

Por gara është e egër edhe në kampin demokrat, ku sondazhet këtë herë e nxjerrin përpara senatorin Bernie Sanders, ndaj Hillary Clintonit, e cila triumfoi në Iowa. Ndonëse një shtet i vogël, New Hampshire u jep kandidatëve mundësinë për të avancuar që në fillim.

Gara mes tyre do të zgjasë 6 muaj në çdo shtet të Amerikës. Të dy kandidatët që nominohen nga konventat e dy partive, asaj republikane dhe asaj demokrate, në muajin nëntor do të garojnë për postin e Presidentit të ri të Shteteve të Bashkuara.

Top Channel