Kampionia e botës në xhudo, Majlinda Kelmendi vazhdon të përballet me indiferentizmin e drejtuesve të sportit dhe politikës në Kosovë.
24-vjeçarja nga Peja, e cila së fundmi mori medaljen e artë në Grand Slamin e Parisit, nuk u prit nga asnjë zyrtar në aeroportin e Prishtinës.
“Kjo nuk është hera e parë që nuk na kanë dalë të na presin, kështu që jemi mësuar tashmë që të vijmë në Prishtinë në mënyrë të thjeshtë. E rëndësishme është që populli i Kosovës po i ndjekë dhe kjo është më e rëndësishmja që t’i bëjë ata sa më krenarë”, shprehet Kelmendi.
Kelmendi tregon edhe arsyen e përlotjes gjatë ceremonisë së dhënies së medaljve në Paris.
Një ditë para garës jam dëmtuar dhe nuk e kam ditur nëse do të marrë pjesë në garë apo jo. Kur arrita fitoren ishte një emocion i madh”, shprehet Majlinda.
Edhe pse mposhti në finale rumunen Andrea Chitu, sportistja nga Kosova vazhdon të qëndrojë në vendin e dytë në renditjen botërore. Por, për 24-vjeçaren Kelmendi kjo gjë nuk përbën problem.
“Mjafton që të jem në katër vendet e para për shkak të Lojërave Olimpike. Me rëndësi janë kampionatet, ndërsa renditja nuk ka shumë rëndësi”, thotë xhudistja kosovare.
Majlinda Kelmendi është sportistja e parë shqiptare që ka siguruar me kualifikim pjesmarrjen në Lojërat Olimpike “Rio 2016”.
Top Channel