Alonso: Nuk do të ketë tripletë për Vettel

”Nuk ndiej asgjë të veçantë, pasi titulli për Vettel ishte diçka që pritej prej kohësh. Tani mbetet të shohim se kush do të jetë kampioni i trefishtë më i ri i historisë midis meje dhe tij. Le të shohim, por unë do të vija bast për veten”, u shpreh spanjolli në një intervistë të dhënë për të përditshmen iberike “Marca”.

Pavarësisht rivalitetit të ndezur, Alonso nuk e neglizhon mirësjelljen. Ai ishte i pari që e uroi brenda në pistë dhe gjithashtu nuk harroi të thonte fjalë të zgjedhura për gjermanin edhe gjatë konferencës për shtyp që pasoi garën e së dielës, të zhvilluar në Japoni.

”Është e pamohueshme që Vettel ka bërë një kampionat të mrekullueshëm dhe që e ka merituar plotësisht këtë titull kampion”, theksoi Alonso. Në të njëjtën linjë edhe piloti i McLaren, Button. “Për mua është e çuditshme ndjesia që kam, pasi jam i trishtuar edhe pse fitova garën. Megjithatë, Vettel kishte kohë që e meritonte këtë titull”, fjalët e anglezit.

Top Channel