Tragjedia detare në Korenë e Jugut

Trageti “Sewol”, në të cilin udhëtonin kryesisht nxënës të një shkolle të mesme, u nis nga porti i Inçeonit në veri-perëndim drejt ishullit jugor Xhexhu.

Të paktën 4 persona raportohet se kanë humbur jetën dhe dhjetëra të tjerë kanë mbetur të plagosur. Zyrtarët koreano-jugorë thanë më herët se 368 persona u shpëtuan, por orë më vonë ata rishikuan numrin e të mbijetuarve. Janë 174.

Pamjet tregojnë tragetin e përmbysur në një kënd. Brenda 2 orësh ai u mbulua nga uji. Korrespondenti i BBC-së në Seul, Martin Patience thotë se, “ekziston frika se kjo mund të jetë tragjedia më e madhe në det këto 20 vitet e fundit”.

Dhjetëra anije dhe helikoterë janë pjesë e operacionit të kërkimit. Pasagjerët që mundën të shpëtojnë u dërguan në një ishull të afërt. Një student i tha medias lokale se ai ishte bllokuar.

Nuk është ende i qartë shkaku i aksidentit, por dëshmitarët folën për një goditje përpara se trageti të përmbysej dhe të mbulohej me shpejtësi nga uji.

Kushtet e motit ishin shumë të mira. Agjencia e lajmeve “Yonhap” tha se trageti u mbyt në një thellësi prej 30 metrash. Trageti kishte dërguar sinjale alarmi rreth 20 km nga ishulli Biungpong në orën 09.00 me orën lokale.

Presidentja e Koresë së Jugut, Park Geun Hye shprehu hidhërim për aksidentin, duke thënë se, “është tragjike që në këtë ngjarje u përfshinë nxënës”. Zyrtarë të kompanisë, në pronësi të të cilës ishte trageti, kërkuan ndjesë për aksidentin.

MV SEWOL
459- Pasagjerë në bord
900- Kapaciteti Maksimal
146 metra- Gjatësia
I ndërtuar më 1994

Top Channel