Euroskeptikët, kundër Merkel-Hollande: Fisnikëria e tyre është kalbur

Mesazhi, tematika e madje edhe fjalët ishin thuajse identike. U bënë thirrje për unitetin, solidaritet, ndershmëri në reagimet e Europës.

Kancelarja hoqi edhe paralele mes BE-së sot, e asaj të 1989-s, hera e fundit kur udhëheqësit e Francës e të Gjermanisë dolën së bashku në të njëjtën foltore. Ajo çfarë ndodhi në Strasburg u përkthye shpejt si përpjekje e dy vendeve për të dëshmuar se, luajnë rol drejtues në BE.

Udhëheqësi i Francës dhe ajo e Gjermanisë e bëjnë çdo gjë së bashku; shpëtojnë bashkë Ukrainën, ndihmojnë refugjatët, mbrojnë Europën prej populistëve. Mesazhi ishte i qartë: nuk ka gjë që na ndan.

Vetëm me një motor të fortë franko-gjerman, kontinenti i vjetër mund t’i zgjidhë problemet brenda dhe jashtë tij. Por, ndryshe nga Helmut Kohl dhe Francois Mitterrand, 26 vite më parë, fjalimet e dy krerëve këtë radhë nuk patën vetëm lavdërime.

Kundërthëniet nuk munguan, e më të zëshmet ishin komentet fshikulluese të nacionalistëve, si Nigel Farage i UKIP-it, që u tha europarlamentarëve se qëllimet dikur fisnike të Francës e Gjermanisë, sot janë kalbur krejtësisht.

Franca – tha Farage, – duke u kthyer nga Hollande, është zënë në çarkun e një monedhe, nga i cili nuk po del dot, e të gjitha këto përpëlitjet që bën për të dalë në pah janë vetëm disa shashka tymuese, qëe i lëshon një Europe të dominuar kokë e këmbë nga Gjermania.

Udhëheqësja e Frontit Nacional, Marine le Pen i akuzoi nga ana tjetër dy udhëheqësit se po përpiqen të vendosin në mënyrë absurde dominimin e vet, e iu drejtua Kancelares gjermane me fjalët: “Madam, nuk po ju njoh më!”.

Top Channel