Zgjedhja e delegatëve të PS-së, përplasje mes Ballës e Blushit në Elbasan

Blushi ka lëshuar akuza të forta, ndërsa Balla i ka quajtur estradë. Pak pas kësaj situate në Elbasan mbërriti edhe kryesocialisti Edi Rama.

Replika Blushi-Balla ka patur edhe për cilësinë e delegatëve.

Ben Blushi: Ky Roshi që votoi për Saliun e ke delegat sot.

Balla: Po shumë mirë se ai kontrobuoi që t’i të bëheshe deputet.

Blushi: Vazhdoni mbusheni partinë me njerëz që kanë votuar Saliun.

Balla: Në 2013 ai ka mbledhur vota për ty.

Blushi: Asnjë votë për mua. Nëse jeni mësuar të merrni vota me kriminelë, me banditë…

Balla: Mos japim spektakël këtu.

Blushi: Shko në Librazhd dhe menaxho zyrën e punës atje.

Balla: Jo, jo!

Por kritikat në adresë të Blushit nuk kishin të mbaruar.

Qytetari: Vini pas 2 vjetësh. Nuk ke ardhur fare në organizatë. Të kam kërkuar që të ishe në mbledhje, vjen sot dhe bën spektakël.

Blushi: Keni Roshin këtu. Çojani prapë Saliut që të votojë për atë.

Deputeti socialist do të lëshonte një akuzë të fortë përballë gazetarëve, që Taulant Balla e quajti estradë.

Blushi: Kam marrë shqetësime nga shumë soacialistë, është një proces relativisht i trukuar. Janë njerëz të emëruar.

Balla: Më vjen mirë që rikthehet deputeti pas 2 vitesh. Edhe sot pamë të njëjtën estradë, të cilën e dëgjojmë nga mënyra sesi flet Sali Berisha. Është e turpshme të fyesh partinë tënde kur ti ke synim të bëhesh kryetar i saj.

Pasi ka ndjekur procesin e votimit të delegatëve në Fier, Rama i është drejtuar Elbasanit pak orë pas zhurmës së krijuar nga ai që kërkon ta sfidojë për postin e kryetarit.

“Ky është një proces shumë i rëndësishëm jo thjesht për kongresin, por për vijimin e një pune të madhe organizative. Kemi objektivin e dyfishimit të numrit të anëtarësisë në 25-vjetorin e PS, për të arritur një fitore në 2017 edhe më bindëse se në 2013 dhe 2015. Në rrugën e asaj rilindjeje që ne jemi zotuar dhe do ta bëjmë realitet, duan apo jo ata që i vijnë mbrapa karvanit duke lehur”, deklaroi Rama.

Top Channel